’آرڈر کا انتظار کریں‘، بشری بی بی کی سزا معطلی کیس کی سماعت مکمل

اسلام آباد: وفاقی آئینی عدالت نے بشریٰ بی بی کی سزا معطلی سے متعلق درخواست کی سماعت مکمل کرلی۔ چیف جسٹس امین الدین خان کی سربراہی میں دو رکنی بینچ نے کیس کی سماعت کی، جس میں بشریٰ بی بی کے وکیل سلمان صفدر نے دلائل دیے، جبکہ سلمان اکرم راجہ بھی کمرہ عدالت میں موجود تھے۔

دورانِ سماعت سلمان صفدر نے مؤقف اختیار کیا کہ خواتین کے مقدمات میں عدالتیں ہمیشہ نرم رویہ اختیار کرتی رہی ہیں۔ ان کا کہنا تھا کہ قومی احتساب بیورو (نیب) کا گزشتہ 13 ماہ کا طرزِ عمل قابلِ اعتراض رہا اور نیب نے متعدد سماعتوں پر التوا بھی لیا۔ انہوں نے کہا کہ نیب نے سزا معطلی کی درخواست پر بھی اعتراض کیا، جبکہ سزا کے بعد بشریٰ بی بی کی ضمانت اور سزا معطلی کے لیے قانونی جواز موجود ہے۔

وکیل نے مزید کہا کہ مقدمے میں زیادہ توجہ بانی پی ٹی آئی کی اپیل پر رہی، جبکہ بشریٰ بی بی کی جانب سے خاتون ہونے کی بنیاد پر سزا معطلی کی استدعا کی گئی ہے۔

چیف جسٹس امین الدین خان نے ریمارکس دیے کہ اس مرحلے پر مقدمے کے میرٹ میں نہ جایا جائے، کیونکہ عدالت کے سامنے فی الحال سزا معطلی کی درخواست ہے۔ جسٹس باقی نجفی نے استفسار کیا کہ مرکزی اپیل کتنی مرتبہ سماعت کے لیے مقرر ہوئی ہے۔

سماعت مکمل ہونے پر چیف جسٹس امین الدین خان نے کہا کہ ’’آرڈر کا انتظار کریں‘‘۔ عدالت نے بشریٰ بی بی کے وکیل سلمان صفدر کو تحریری دلائل کے نکات جمع کرانے کی ہدایت بھی کی۔