افغان سرحد سے دخل اندازی کی کوشش کرنے والے 12 خوارج ہلاک

اسلام آباد: افغان سرحد سے ضلع کرم میں دراندازی کی کوشش ناکام بنا دی گئی، سکیورٹی فورسز کی جوابی کارروائی میں 12 خوارج اور افغان طالبان کے اہلکاروں کی ہلاکت کی اطلاع ہے، جبکہ فائرنگ کے شدید تبادلے میں پاک فوج کے نائب صوبیدار ہدایت امان نے جامِ شہادت نوش کیا۔

پاک فوج کے شعبہ تعلقات عامہ (آئی ایس پی آر) کے مطابق 10 اکتوبر کو دہشت گردوں نے افغان سرحد سے ضلع کرم میں داخل ہونے کی کوشش کی، تاہم سکیورٹی فورسز نے بروقت اور مؤثر کارروائی کرتے ہوئے دراندازی کی کوشش ناکام بنا دی۔

آئی ایس پی آر کے بیان میں کہا گیا کہ افغان طالبان کی چوکیوں سے بھی دراندازی کی کوشش کے دوران فائرنگ کی گئی، جس کے جواب میں پاکستانی فورسز نے کارروائی کی۔ بیان کے مطابق اس کارروائی میں 12 خوارج اور افغان طالبان کے اہلکار ہلاک ہوئے۔

فائرنگ کے شدید تبادلے کے دوران نائب صوبیدار ہدایت امان شہید ہوگئے۔ آئی ایس پی آر کے مطابق شہید کی عمر 40 سال تھی اور ان کا تعلق گلگت بلتستان کے ضلع غذر سے تھا۔

سکیورٹی فورسز نے سرحدی علاقے میں دراندازی کی کوشش ناکام بنا دی، جبکہ واقعے سے متعلق تفصیلات آئی ایس پی آر کے جاری کردہ بیان میں سامنے آئی ہیں۔