سعودی عرب کی درخواست پر پاکستان کا یمن میں حوثیوں کے خلاف کارروائی پر غور

اسلام آباد: ترکیہ ٹوڈے کی رپورٹ کے مطابق پاکستان سعودی عرب کی درخواست پر یمن میں حوثی فورسز کے خلاف ممکنہ فضائی کارروائی کا جائزہ لے رہا ہے۔

رپورٹ میں پاکستانی ذرائع کے حوالے سے دعویٰ کیا گیا ہے کہ ممکنہ کارروائی جلد کی جا سکتی ہے، تاہم اس حوالے سے حتمی فیصلہ تاحال نہیں کیا گیا۔ ذرائع کے مطابق زیرِ غور آپریشن میں یمن کے صوبہ صعدہ سمیت مختلف علاقوں میں حوثی فورسز کے ٹھکانوں کو نشانہ بنایا جا سکتا ہے۔

یہ صورتحال سعودی عرب اور حوثیوں کے درمیان بڑھتی کشیدگی کے دوران سامنے آئی ہے۔ 2022 میں ہونے والی جنگ بندی جولائی میں ختم ہونے کے بعد سعودی عرب کے تیل کے بنیادی ڈھانچے اور دیگر تنصیبات پر حوثیوں کے حملوں کی اطلاعات سامنے آتی رہی ہیں۔

رپورٹ کے مطابق حوثیوں کی جانب سے سعودی عرب کے خلاف سمندری ناکہ بندی اور سعودی بحری جہازوں کو نشانہ بنانے کے اعلانات کے بعد ریاض کی تیل برآمدات کو بھی مشکلات کا سامنا ہے۔ دوسری جانب آبنائے ہرمز کی بندش سے پیدا ہونے والی صورتحال نے بھی خطے کی توانائی کی تجارت کو متاثر کیا ہے۔

گزشتہ روز حوثیوں کی جانب سے سعودی عرب کے مختلف علاقوں میں میزائل اور ڈرون حملوں کی اطلاعات سامنے آئیں۔ ابہا، جازان، نجران اور خمیس مشیط سمیت متعدد مقامات متاثر ہوئے، جبکہ ان حملوں میں 73 افراد کے زخمی ہونے کی اطلاع دی گئی۔ بعض توانائی تنصیبات بھی متاثر ہونے کی اطلاعات ہیں۔

حملوں کے جواب میں سعودی عرب نے یمن میں حوثی ٹھکانوں پر فضائی کارروائیاں کیں۔ حوثی میڈیا نے دعویٰ کیا کہ سعودی حملوں کے نتیجے میں الجوف میں جانی نقصان ہوا، تاہم ریاض کی جانب سے اس دعوے کی باضابطہ تصدیق سامنے نہیں آئی۔

اگر پاکستان کی جانب سے سعودی درخواست پر حوثیوں کے خلاف براہِ راست فوجی کارروائی کی منظوری دی جاتی ہے تو یمن کے تنازع میں پاکستان کی عسکری شمولیت خطے کی مجموعی صورتحال پر نمایاں اثر ڈال سکتی ہے۔