سعودی عرب پر حوثیوں کا پھر بڑا حملہ، 3 شہروں کی جانب بیلسٹک میزائل اور ڈرون داغ دیے گئے

ریاض: یمن میں حوثیوں نے سعودی عرب کے جنوبی علاقوں میں تازہ میزائل اور ڈرون حملے کیے ہیں۔

سعودی قیادت میں قائم اتحاد کے ترجمان میجر جنرل ترکی المالکی کے مطابق حوثیوں نے خمیس مشیط، ابہا اور جازان کی جانب متعدد بیلسٹک میزائل اور ڈرون داغے۔

ترجمان کے مطابق حملوں میں کسی جانی نقصان کی اطلاع نہیں ملی، تاہم اتحادی افواج سعودی عرب کی خودمختاری، قومی تنصیبات اور شہریوں کے تحفظ کے لیے حملوں کا مناسب جواب دیں گی۔

رپورٹس کے مطابق حوثیوں نے حالیہ دنوں میں سعودی عرب کے جنوبی علاقوں میں توانائی اور فوجی تنصیبات کو بھی نشانہ بنایا ہے، جبکہ سعودی حمایت یافتہ فورسز یمن میں حوثیوں کے خلاف کارروائیاں کر رہی ہیں۔

تازہ کشیدگی کے باعث بحیرہ احمر اور باب المندب کی اہم بحری گزرگاہوں کی سکیورٹی سے متعلق خدشات بھی بڑھ گئے ہیں۔ یمن میں گزشتہ ہفتے سے جاری نئی لڑائی میں 500 سے زائد افراد کی ہلاکت کی اطلاعات سامنے آئی ہیں، تاہم ان اعداد و شمار کی آزادانہ تصدیق نہیں ہوسکی۔