بلوچستان میں کوئی نوکری فروخت نہیں ہوگی، وزیراعلیٰ نے افسران سے حلف لے لیا

کوئٹہ: وزیراعلیٰ بلوچستان میر سرفراز بگٹی نے واضح کیا ہے کہ بلوچستان میں کسی بھی نوجوان کی نوکری فروخت نہیں ہونے دی جائے گی، نوکریوں کی خرید و فروخت ثابت ہونے پر متعلقہ وزیر اور سیکرٹری کو عہدے پر نہیں رہنے دیا جائے گا۔

وزیراعلیٰ بلوچستان کی زیرصدارت سیکرٹریز کمیٹی کا اجلاس ہوا، جس میں مختلف محکموں کی کارکردگی اور بھرتیوں کے معاملات کا جائزہ لیا گیا۔ اجلاس میں وزیراعلیٰ نے تمام سیکرٹریز سے اللہ کو حاضر و ناظر جان کر حلف لیا کہ وہ بلوچستان کے نوجوانوں کی نوکریاں فروخت نہیں ہونے دیں گے۔

میر سرفراز بگٹی نے کہا کہ انہوں نے روزِ اول سے واضح کر رکھا ہے کہ صوبے میں کوئی نوکری نہیں بکے گی، اس اصولی موقف پر کابینہ اراکین اور چیف سیکرٹری سمیت سب ایک پیج پر ہیں۔ انہوں نے کہا کہ سردی میں ٹھٹھرتے اور گرمی میں جھلستے نوجوانوں کی نوکری فروخت ہونے دینا کسی صورت قابل قبول نہیں۔

وزیراعلیٰ نے محکمہ جنگلات میں بھرتیوں کے حوالے سے بے ضابطگیوں کی شکایات پر اعلیٰ سطحی تحقیقات کا حکم دیتے ہوئے کہا کہ مصدقہ شواہد اور غیرجانبدارانہ تحقیقات میں جرم ثابت ہونے پر ملوث کردار سزا سے نہیں بچ سکیں گے۔

انہوں نے افسران کو ہدایت کی کہ ماتحت اہلکاروں اور ریکروٹمنٹ کمیٹیوں پر کڑی نظر رکھی جائے اور بھرتیوں میں کسی بھی سطح پر بے ضابطگی برداشت نہیں کی جائے گی۔ ان کا کہنا تھا کہ نوکریوں کی خرید و فروخت روکنے کے لیے ہر طرح کا دباؤ برداشت کیا جائے گا، تاہم نوجوانوں کے حق پر کوئی سمجھوتہ نہیں ہوگا۔

میر سرفراز بگٹی نے کہا کہ افسران پر مکمل اعتماد ہے، وہ باصلاحیت ہیں اور بلوچستان کو درست سمت میں لے جانے کی صلاحیت رکھتے ہیں۔ انہوں نے کہا کہ میرٹوکریسی قائم کرکے ہی نوجوانوں کا ریاست پر اعتماد بحال کیا جا سکتا ہے۔