بلوچستان میں ترقیاتی منصوبوں کی رفتار تیز کی جائے گی، میر سلیم کھوسہ

صوبائی وزیر مواصلات و تعمیرات بلوچستان میر سلیم کھوسہ نے کہا ہے کہ صوبے بھر میں سڑکوں، پلوں اور دیگر تعمیراتی منصوبوں پر کام تیز رفتار سے جاری ہے تاکہ عوام کو بہتر سفری سہولیات فراہم کی جا سکیں۔ انہوں نے کہا کہ بلوچستان کی ترقی کا دارومدار مضبوط مواصلاتی نظام پر ہے، اسی لیے حکومت تمام اضلاع میں سڑکوں کی تعمیر و بحالی کے منصوبوں کو ترجیحی بنیادوں پر مکمل کر رہی ہے۔میر سلیم کھوسہ نے اپنے بیان میں کہا کہ محکمہ مواصلات و تعمیرات شفافیت اور معیار پر کسی قسم کا سمجھوتہ نہیں کرے گا۔ تمام ترقیاتی اسکیموں کی باقاعدہ مانیٹرنگ کی جا رہی ہے، اور متعلقہ افسران کو ہدایت دی گئی ہے کہ وہ کام کے معیار کو ہر صورت یقینی بنائیں۔انہوں نے مزید کہا کہ دیہی علاقوں کو ضلعی ہیڈکوارٹرز سے ملانے والے منصوبے صوبے کی معیشت کے لیے ریڑھ کی ہڈی کی حیثیت رکھتے ہیں۔ ان منصوبوں کی تکمیل سے نہ صرف عوام کو آمد و رفت میں سہولت ملے گی بلکہ تجارتی سرگرمیوں میں بھی اضافہ ہوگا۔وزیر مواصلات نے عوام سے اپیل کی کہ وہ ترقیاتی منصوبوں کی نگرانی میں حکومت کے ساتھ تعاون کریں تاکہ بلوچستان کو ترقی کی راہ پر گامزن کیا جا سکے۔