سیکیورٹی آپریشنز؛ خیبر پختونخوا اور بلوچستان میں چند روز کے دوران 49 دہشت گرد ہلاک

راولپنڈی: خیبر پختونخوا اور بلوچستان کے مختلف علاقوں میں سیکیورٹی فورسز کے انٹیلی جنس بیسڈ آپریشنز کے دوران 49 دہشت گرد ہلاک ہوگئے۔

آئی ایس پی آر کے مطابق خیبر پختونخوا کے اضلاع بنوں، شمالی وزیرستان، اورکزئی اور خیبر میں متعدد کارروائیاں کی گئیں، جن میں 12 دہشت گرد ہلاک ہوئے۔

کارروائیوں کے دوران بڑی مقدار میں دھماکا خیز مواد، آئی ای ڈی ڈیٹونیٹنگ ریموٹ، اسلحہ، گولہ بارود اور موٹر سائیکلیں برآمد کرکے تباہ کردی گئیں۔

بلوچستان میں مستونگ، ماشکیل، خضدار اور پنجگور کے اضلاع میں 10 انٹیلی جنس بیسڈ آپریشنز کیے گئے، جن کے دوران 37 دہشت گرد ہلاک ہوئے۔ کارروائیوں میں بڑی مقدار میں اسلحہ، دھماکا خیز مواد اور ریموٹ ڈیٹونیشن آلات بھی قبضے میں لے کر تباہ کیے گئے۔

آئی ایس پی آر کے مطابق سیکیورٹی فورسز اور قانون نافذ کرنے والے اداروں کی کارروائیاں ملک میں غیر ملکی سرپرستی اور حمایت یافتہ دہشت گردی کے خاتمے تک جاری رہیں گی۔