فتنۃ الہندوستان کے دہشتگردوں کو بیرونی سرپرستی اور مالی معاونت کے مزید شواہد سامنے آ گئے

اسلام آباد: فتنۃ الہندوستان کی جانب سے جاری کی گئی جدید طرز کی ویڈیو نے ایک بار پھر اس تنظیم کی سرگرمیوں اور مبینہ بیرونی معاونت سے متعلق سوالات کو جنم دے دیا ہے۔

رپورٹ کے مطابق سوشل میڈیا پر جاری ویڈیو میں جدید ڈرون فوٹیج، ہائی ڈیفینیشن ریکارڈنگ اور سینمیٹک انداز کی ایڈیٹنگ استعمال کی گئی ہے، جس پر سوال اٹھایا جا رہا ہے کہ محدود وسائل رکھنے والے گروہ کو اس نوعیت کی تکنیکی صلاحیت اور سہولیات کہاں سے حاصل ہو رہی ہیں۔

دعویٰ کیا گیا ہے کہ ویڈیو میں جدید آلات اور اسلحہ نظر آ رہا ہے، جو تنظیم کو حاصل مبینہ بیرونی مدد کی نشاندہی کرتا ہے۔

رپورٹ میں اقوام متحدہ کی مختلف رپورٹس کا حوالہ دیتے ہوئے کہا گیا ہے کہ افغانستان میں موجود بعض دہشتگرد گروہوں کی سرگرمیاں خطے کے ممالک کے لیے خطرہ بنی ہوئی ہیں۔

مزید کہا گیا ہے کہ افغانستان سے متعلق مختلف رپورٹس میں دہشتگرد تنظیموں کی تربیت، مالی وسائل اور اسلحہ تک رسائی کے معاملات پر تشویش کا اظہار کیا گیا ہے۔

سیگار کی ایک رپورٹ کے مطابق 2021 میں امریکی افواج کے انخلا کے بعد افغانستان میں بڑی مقدار میں فوجی ساز و سامان موجود رہا، جس کے حوالے سے مختلف خدشات سامنے آتے رہے ہیں۔

سیکیورٹی ماہرین کے مطابق خطے میں دہشتگرد گروہوں کی مالی معاونت، جدید ٹیکنالوجی تک رسائی اور سرحد پار سرگرمیاں امن و سلامتی کے لیے ایک بڑا چیلنج ہیں، جبکہ ان عوامل کی روک تھام کے لیے مؤثر اقدامات ضروری ہیں۔