پاکستان نے آئی ایم ایف کی پانچویں قسط کے حصول کیلئے تیاریاں شروع کر دیں

پاکستان نے آئی ایم ایف کی پانچویں قسط کے حصول کیلئے تیاریاں شروع کر دیں

اسلام آباد: پاکستان نے عالمی مالیاتی فنڈ (آئی ایم ایف) کے ایکسٹینڈڈ فنڈ فیسیلیٹی پروگرام کے تحت پانچویں قسط کے حصول کے لیے تیاریوں کا آغاز کر دیا ہے۔

ذرائع وزارت خزانہ کے مطابق پاکستان اور آئی ایم ایف کے درمیان پروگرام کے آئندہ جائزے کے لیے مذاکرات اگلے ماہ متوقع ہیں، جس کے لیے آئی ایم ایف کا وفد پاکستان کا دورہ کرے گا۔

وزارت خزانہ نے مذاکرات کی تیاری کے سلسلے میں تمام متعلقہ وزارتوں کو ضروری ڈیٹا اور رپورٹس مکمل کرنے کی ہدایات جاری کر دی ہیں۔ متعلقہ وزارتیں آئی ایم ایف وفد کو معاشی اصلاحات، اسٹرکچرل بینچ مارکس اور مقررہ اہداف پر بریفنگ دیں گی۔

ذرائع کے مطابق مذاکرات کے دوران توانائی شعبے کی اصلاحات، بجلی اور گیس کے شعبوں میں سرکلر ڈیٹ کے خاتمے سمیت دیگر اہم معاملات کا جائزہ لیا جائے گا۔

حکام کے مطابق اگر پاکستان اور آئی ایم ایف کے درمیان مذاکرات کامیاب رہتے ہیں تو موجودہ قرض پروگرام کے تحت پاکستان کو مجموعی طور پر تقریباً 1.2 ارب ڈالر ملنے کا امکان ہے۔ اس رقم میں تقریباً ایک ارب ڈالر پانچویں قسط جبکہ موسمیاتی تبدیلیوں کے اثرات سے نمٹنے کے لیے تقریباً 20 کروڑ ڈالر کی معاونت شامل ہو سکتی ہے۔

حکومت کا کہنا ہے کہ آئی ایم ایف پروگرام کے اہداف پر عملدرآمد اور معاشی اصلاحات کا سلسلہ جاری رکھا جا رہا ہے تاکہ مالی استحکام کو مزید بہتر بنایا جا سکے۔