وزیراعظم کا ٹیکس اہداف کے حصول کیلیے انفورسمنٹ اقدامات تیز کرنے کا حکم

اسلام آباد: وزیراعظم شہباز شریف نے ٹیکس وصولیوں کے مقررہ اہداف حاصل کرنے کے لیے ایف بی آر کو انفورسمنٹ اقدامات مزید مؤثر اور تیز کرنے کی ہدایت کردی۔

ایف بی آر اصلاحات سے متعلق اجلاس کی صدارت کرتے ہوئے وزیراعظم نے اسمگلنگ، ٹیکس چوری اور غیر قانونی کاروبار کے خلاف کارروائیاں جاری رکھنے پر زور دیا۔ انہوں نے ایف بی آر کے حساس عہدوں پر اچھی شہرت اور دیانت داری کے حامل افسران و اہلکاروں کی تعیناتی کی بھی ہدایت کی۔

وزیراعظم نے ان لینڈ ریونیو کے لیے مجوزہ فیس لیس نظام کو 2027 تک مکمل طور پر نافذ کرنے کی ہدایت کرتے ہوئے کہا کہ جدید ٹیکنالوجی اور مصنوعی ذہانت پر مبنی یہ نظام ٹیکس اصلاحات میں اہم کردار ادا کرے گا۔

اجلاس میں بتایا گیا کہ فیس لیس ان لینڈ ریونیو نظام کا پہلا مرحلہ یکم اکتوبر 2026 سے شروع ہوگا، جبکہ ٹیکس کیسز کو جغرافیائی حدود کے بجائے رینڈم بنیادوں پر مختص کیا جائے گا۔

وزیراعظم نے چکوال اور صوابی میں غیر قانونی سگریٹ فیکٹریوں کے خلاف ایف بی آر کی کارروائیوں کو بھی سراہا۔