میر رضا کیس میں اہم پیش رفت، قبر کشائی کے بعد 17 سیمپلز حاصل

میر رضا کیس میں اہم پیش رفت، قبر کشائی کے بعد 17 سیمپلز حاصل

نوجوان میر رضا علی کیس میں قبر کشائی اور دوبارہ پوسٹ مارٹم کے بعد تحقیقات میں اہم پیش رفت سامنے آئی ہے۔ تفتیشی ذرائع کے مطابق مجموعی طور پر 17 سیمپلز حاصل کیے گئے ہیں، جنہیں مزید فرانزک جانچ کے لیے بھیجا جائے گا۔

مقتول کے اہلخانہ کے وکیل جبران ناصر نے میڈیا سے گفتگو کرتے ہوئے پولیس کی تفتیش پر تحفظات کا اظہار کیا۔ ان کا الزام ہے کہ پولیس حکام کیس کی تحقیقات کے بجائے متاثرہ خاندان کو مبینہ طور پر ہراساں کر رہے ہیں۔

جبران ناصر کے مطابق اہلخانہ کو پولیس دفتر بلا کر مبینہ طور پر یہ کہا جاتا رہا کہ پولیس کے تجربے کے مطابق میر رضا نے خودکشی کی ہے۔ تاہم وکیل نے اس مؤقف پر سوالات اٹھاتے ہوئے شفاف اور غیرجانبدارانہ تحقیقات کا مطالبہ کیا۔

وکیل نے مزید دعویٰ کیا کہ میر رضا کے چہرے اور آنکھوں کے حصے میں غیر معمولی تبدیلیاں پائی گئی ہیں، جن کی وجوہات فرانزک تحقیقات سے واضح ہوں گی۔

اس سے قبل جبران ناصر کا کہنا تھا کہ تحقیقات مکمل ہونے کے بعد یہ واضح ہوجائے گا کہ میر رضا کی موت قتل تھی یا خودکشی، جبکہ جسم پر تشدد کے الزامات اور اس میں مبینہ طور پر ملوث افراد سے متعلق بھی حقائق سامنے آئیں گے۔

ذرائع کے مطابق قبر کشائی کے بعد دوبارہ پوسٹ مارٹم کیا گیا، جس میں مبینہ طور پر گولی لگنے اور جسم پر تشدد کے نشانات سے متعلق اہم شواہد سامنے آئے ہیں۔ فرانزک ٹیم کی جانب سے مختلف پہلوؤں کا جائزہ لیا جا رہا ہے، جبکہ حتمی نتیجہ مکمل فرانزک اور قانونی تحقیقات کے بعد سامنے آئے گا۔