سونے کی قیمت میں مسلسل تیسرے روز اضافہ

کراچی: عالمی اور مقامی مارکیٹوں میں سونے کی قیمتوں میں اضافے کا سلسلہ جاری ہے، جس کے باعث سونا مزید مہنگا ہوگیا۔

بین الاقوامی مارکیٹ میں فی اونس سونے کی قیمت میں 51 ڈالر کا اضافہ ریکارڈ کیا گیا، جس کے بعد قیمت 4 ہزار 319 ڈالر فی اونس کی سطح پر پہنچ گئی۔

عالمی مارکیٹ میں اضافے کے اثرات مقامی صرافہ بازاروں پر بھی پڑے، جہاں فی تولہ سونے کی قیمت 5 ہزار 100 روپے اضافے کے بعد 4 لاکھ 54 ہزار 336 روپے ہوگئی۔

اسی طرح 10 گرام سونے کی قیمت میں بھی 4 ہزار 372 روپے کا اضافہ ہوا، جس کے بعد نئی قیمت 3 لاکھ 89 ہزار 519 روپے ہوگئی۔

دوسری جانب چاندی کی قیمتوں میں بھی اضافہ دیکھا گیا، عالمی مارکیٹ میں فی اونس چاندی 2 ڈالر 80 سینٹس اضافے کے بعد 64 ڈالر 60 سینٹس پر پہنچ گئی، جبکہ پاکستان میں فی تولہ چاندی کی قیمت 280 روپے اضافے سے 6 ہزار 939 روپے ہوگئی۔