بلوچستان میں گڈ گورننس کی جانب بڑا قدم، 10 محکموں میں سمریز کی ڈیجیٹلائزیشن شروع

وزیر اعلیٰ بلوچستان میر سرفراز بگٹی کی زیر صدارت سروس ڈیلیوری میں بہتری سے متعلق اہم اجلاس منعقد ہوا، جس میں سرکاری امور کو جدید ڈیجیٹل نظام پر منتقل کرنے کے عمل کا جائزہ لیا گیا۔

اجلاس کو بتایا گیا کہ بلوچستان کے 28 سرکاری محکموں میں ای فائلنگ کے نظام کے تحت ایک لاکھ 83 ہزار سے زائد ای فائلز نمٹائی جاچکی ہیں، جبکہ اب سمریز کی ڈیجیٹلائزیشن کا عمل بھی شروع کردیا گیا ہے۔ ابتدائی مرحلے میں 10 سرکاری محکموں کی سمریز کو ڈیجیٹل نظام پر منتقل کیا جا رہا ہے۔

اجلاس کو بریفنگ میں بتایا گیا کہ سمریز کی ڈیجیٹلائزیشن سے سرکاری امور کی انجام دہی میں تیزی آئے گی اور فیصلہ سازی کا عمل بہتر ہوگا۔

اس موقع پر وزیر اعلیٰ میر سرفراز بگٹی نے ہدایت کی کہ سرکاری امور کو جدید ڈیجیٹل نظام پر منتقل کرنے کے عمل کو تیز کیا جائے اور غیر ضروری تاخیر کا خاتمہ کرکے بروقت فیصلوں کو یقینی بنایا جائے۔

وزیر اعلیٰ بلوچستان نے کہا کہ ڈیجیٹل نظام کے ذریعے سرکاری کاموں میں شفافیت، رفتار اور جوابدہی کو فروغ ملے گا۔ جدید ٹیکنالوجی کا استعمال عوام کو بہتر اور بروقت سرکاری خدمات فراہم کرنے کے لیے ناگزیر ہے۔

انہوں نے متعلقہ محکموں کو ڈیجیٹلائزیشن کے عمل میں مؤثر معاونت یقینی بنانے کی ہدایت کرتے ہوئے کہا کہ حکومتی کارکردگی بہتر بنانے کے لیے روایتی طریقہ کار کی جگہ مؤثر ڈیجیٹل نظام اپنانا ہوگا۔

میر سرفراز بگٹی کے مطابق سرکاری امور میں آسانی، تیز رفتار فیصلہ سازی اور عوامی سہولت ڈیجیٹل اصلاحات کے بنیادی مقاصد ہیں۔