چمن میں مزدور کیمپ پر دستی بم حملہ، ایک مزدور جاں بحق، چار زخمی

چمن: کوئٹہ کراچی قومی شاہراہ این-25 پر جاری تعمیراتی منصوبے کے مزدوروں کے کیمپ پر نامعلوم افراد نے دستی بم حملہ کر دیا، جس کے نتیجے میں ایک مزدور جاں بحق جبکہ چار زخمی ہو گئے۔

پولیس کے مطابق دھماکے میں پانچ مزدور شدید زخمی ہوئے جنہیں فوری طور پر اسپتال منتقل کیا گیا، تاہم ایک زخمی راستے میں دم توڑ گیا، جبکہ چار زخمیوں کو مزید علاج کے لیے کوئٹہ منتقل کر دیا گیا۔

پولیس نے بتایا کہ جاں بحق مزدور کی شناخت نصرالدین ولد غلام فرید کے نام سے ہوئی ہے، جس کی عمر 28 سال تھی اور وہ ضلع کشمور، سندھ کا رہائشی تھا۔

واقعے کے بعد حملہ آور فرار ہونے میں کامیاب ہو گئے۔ اطلاع ملتے ہی پولیس کی بھاری نفری موقع پر پہنچ گئی، علاقے کو گھیرے میں لے کر شواہد اکٹھے کیے اور سرچ آپریشن شروع کر دیا۔

پولیس کے مطابق متاثرہ مزدور چمن۔کوئٹہ۔کراچی ایکسپریس وے (این-25) منصوبے پر کام کر رہے تھے، جبکہ واقعے کی تحقیقات جاری ہیں اور حملہ آوروں کی گرفتاری کے لیے کارروائی کی جا رہی ہے۔