سسٹم کی ناکامی کے اسباب اور ذمہ داروں کا تعین کیا جائے، آغا حسین مقدسی

اسلام آباد ( )سربراہ تحریک نفاذ فقہ جعفریہ پاکستان علامہ آغا سید حسین مقدسی نے کہا ہے کہ مقتدر قوتوں کا سسٹم کی ناکامی کا صرف اعلان کافی نہیں اس کے علل و اسباب اور ذمہ داروں کا تعین بھی کیا جائے، نظام کو لاحق مہلک امراض سے نجات دلائی جائے، دہشتگردی، لاقانونیت، کرپشن لوٹ کھسوٹ، بنیادی حقوق کی سلبی اور آئین کی پیوندکاری کا سدباب کیے بغیر کوئی علاج کارگر نہیں ہوسکتا۔ بانیانِ پاکستان کی امنگوں کا عکاس نظام ہی سسٹم کو کامیاب کر سکتا ہے، مشرقِ وسطیٰ جنگ کا پھیلاؤ صیہونی ایجنڈے کا حصہ ہے، عراق پر حملے کے محرکات ختم کرنا استعماری عزائم کو ناکام کر سکتا ہے،عراق میں زائرین پر حملہ قابلِ مذمت ہے، ایامِ عزاء و اربعینِ حسینی کی حرمت کا پاس کیا جائے، شعائر اللہ اور مقدسات کی حفاظت عرب و عجم دونوں کی ذمہ داری ہے۔ ہیڈکوارٹر مکتب تشیع میں اربعینِ حسینی چہلم شہدائے کربلاکمیٹی کے اجلاس سےخطاب کرتے ہوئے علامہ آغا سید حسین مقدسی نے کہا کہ کشمیر سمیت دیگر قومی وملکی مسائل میں دانشمندی وبصیرت سے کام لیا جائے، ازلی دشمن گھات لگائے بیٹھا ہے۔ آغا مقدسی نے کہا کہ ملک کی کامیابی جمہوریت میں ہے جسے تہتر کے آئین میں ڈھالا جائے، عوام صدارتی یا پارلیمانی نظام نہیں بلکہ امن و خوشحالی اور مسائل کا حل چاہتی ہے۔ آقائے مقدسی نے کہا کہ حکمرانوں کی نااہلی، مہنگائی اور شاہ خرچیوں نے عوام کے سب کَس بَل نکال دیے ہیں۔ سربراہ تحریک نفاذ فقہ جعفریہ پاکستان علامہ آغا مقدسی نے حیرت کا اظہار کیا کی وطن اور اہلِ وطن جس کربناک دور سے گزر رہا ہے اس میں پارلیمان اوراس کے ایوان خاموش تماشائی کیوں ہیں؟ خاموش ایوانوں نے عوام کا اعتماد کھو دیا ہے لہذا قومی سوچ اور امنگوں کو یکجا کیا جائے۔ علامہ مقدسی نے عرب وعجم کو دست و گریباں کرنے کی صیہونی سازش کو ناکام کرنے کی ضرورت پر زور دیتے ہوئے کہا کہ جنگی شعلے مزید بھڑکانے کے بجائے بجھائے جائیں۔ علامہ مقدسی نے محرم الحرام ایامِ عزاء کمیٹی کی خدمات کو سراہا اور اس عزم کا اظہار کیا کہ قائد ملت جعفریہ آغا سید حامد علی شاہ موسوی کی تعلیمات اور خط پر چلتے ہوئےحرمتِ عزاداری کے لیے جدوجہد جاری رکھیں گے۔