اقلیتی طلبہ کے 2 فیصد تعلیمی کوٹے پر عملدرآمد کی رپورٹ جاری کی جائے، منارٹی فورم کا مطالبہ

لاہور (سپیشل رپورٹر): منارٹی فورم پاکستان کے جنرل سیکرٹری ڈینیل میسی کی قیادت میں پانچ رکنی وفد نے گورنر پنجاب سردار سلیم حیدر خان سے گورنر ہاؤس لاہور میں ملاقات کی۔ وفد میں سینٹر فار سوشل جسٹس (CSJ) کے ایگزیکٹو ڈائریکٹر پیٹر جیکب، معروف سماجی کارکن تنویر جہاں اور دیگر نمائندگان شامل تھے۔ ملاقات کے دوران اقلیتی برادری کے مساوی شہریت، آئینی حقوق، سماجی شمولیت، مذہبی آزادی اور تعلیم تک مساوی رسائی سمیت مختلف اہم امور پر تفصیلی تبادلہ خیال کیا گیا۔ وفد نے حکومت پنجاب سے مطالبہ کیا کہ اقلیتی طلبہ کے لیے مختص 2 فیصد تعلیمی کوٹے پر عملدرآمد کے حوالے سے جامع کمپلائنس رپورٹ جاری کی جائے تاکہ پالیسی کے مؤثر نفاذ کا جائزہ لیا جا سکے اور موجودہ خامیوں کو دور کرنے کے لیے مؤثر اقدامات کیے جا سکیں۔ اس موقع پر وفد نے اس عزم کا اظہار کیا کہ ریاستی اداروں اور سول سوسائٹی کے باہمی تعاون سے ایسے اقدامات کو فروغ دیا جانا چاہیے جو پاکستان میں تمام شہریوں کے لیے مساوی حقوق، مذہبی آزادی اور شمولیتی طرزِ حکمرانی کو مزید مضبوط بنائیں۔گورنر پنجاب سردار سلیم حیدر خان نے وفد کی تجاویز کو توجہ سے سنا اور اقلیتی برادری سے متعلق امور پر مثبت پیش رفت اور متعلقہ اداروں کے ساتھ ضروری اقدامات کی یقین دہانی کرائی۔