دالبندین: نوکچا میں پانچ افراد مبینہ طور پر اغواء، جلائے گئے بوزرز کا ملبہ اٹھانے پہنچے تھے

دالبندین: ضلع چاغی کے علاقے نوکچا میں دو روز قبل نذرِ آتش کیے گئے بوزرز اور ٹریلرز کا ملبہ اٹھانے کے لیے آنے والے پانچ افراد کو مسلح افراد نے مبینہ طور پر اغواء کر لیا۔

پولیس ذرائع کے مطابق دو روز قبل نوکچا کے مقام پر مسلح افراد نے پانچ بوزرز اور ٹریلرز کو آگ لگا دی تھی۔ واقعے کے بعد گاڑیوں کے مالکان اور دیگر افراد جلے ہوئے ملبے کو ہٹانے کے لیے علاقے میں پہنچے، جہاں مسلح افراد نے پانچ افراد کو مبینہ طور پر اغواء کرکے نامعلوم مقام پر منتقل کر دیا۔

ذرائع کے مطابق اغواء ہونے والوں میں گاڑیوں کے مالکان بھی شامل ہیں، تاہم ان کی شناخت اور موجودہ مقام کے بارے میں تاحال کوئی سرکاری تفصیلات سامنے نہیں آئی ہیں۔

واقعے کے بعد علاقے میں تشویش کی فضا پائی جا رہی ہے، جبکہ مغوی افراد کی بازیابی کے لیے متعلقہ اداروں کی کارروائی جاری ہونے کی اطلاعات ہیں۔