کوئٹہ میں اے آئی ٹریفک سگنلز نصب ہوں گے،وزیراعلیٰ بلوچستان

کوئٹہ: وزیراعلیٰ بلوچستان میر سرفراز بگٹی کی زیر صدارت اجلاس میں صوبائی دارالحکومت کوئٹہ میں ٹریفک مسائل کے مستقل حل کے لیے جدید اے آئی بیسڈ ٹریفک سگنلز نصب کرنے کا فیصلہ کیا گیا۔

اجلاس میں شہر میں جدید ٹریفک مینجمنٹ سسٹم کے نفاذ کی حکمت عملی کا جائزہ لیا گیا، جبکہ بریفنگ میں بتایا گیا کہ بڑھتے ہوئے ٹریفک دباؤ پر قابو پانے کے لیے مصنوعی ذہانت پر مبنی ٹریفک سگنلز فعال کیے جائیں گے۔

وزیراعلیٰ نے ہدایت کی کہ جدید ٹیکنالوجی کے ذریعے ٹریفک کے بہاؤ کو بہتر بنا کر شہریوں کو محفوظ، منظم اور بہتر سفری سہولیات فراہم کی جائیں۔ انہوں نے متعلقہ اداروں کو مؤثر، پائیدار اور جدید ٹریفک نظام کے لیے مربوط اقدامات یقینی بنانے کی بھی ہدایت کی۔

میر سرفراز بگٹی کا کہنا تھا کہ شہریوں کی سہولت اور محفوظ ٹریفک نظام حکومت بلوچستان کی اولین ترجیح ہے، جبکہ ٹریفک مسائل کا جدید ٹیکنالوجی کے ذریعے حل حکومت کے اصلاحاتی ایجنڈے کا اہم حصہ ہے۔

انہوں نے کہا کہ اے آئی بیسڈ ٹریفک مینجمنٹ سے سفر کا دورانیہ کم ہوگا، سڑکوں پر نظم و ضبط، شفافیت اور مؤثر نگرانی کو فروغ ملے گا، اور کوئٹہ کو جدید شہری سہولیات سے آراستہ کرنے کے حکومتی وژن کو عملی شکل دی جائے گی۔