جنگ بندی کے اشارے، عالمی منڈی میں خام تیل 100 ڈالر سے نیچے آ گیا

لندن: امریکا اور ایران کے درمیان کشیدگی میں کمی اور ممکنہ جنگ بندی کے اشاروں کے بعد عالمی منڈی میں خام تیل کی قیمتوں میں نمایاں کمی دیکھنے میں آئی ہے۔

خبر رساں ادارے رائٹرز کے مطابق امریکی صدر ڈونلڈ ٹرمپ کی جانب سے ایران کے خلاف مزید حملے عارضی طور پر روکنے کے فیصلے سے سرمایہ کاروں میں یہ توقع پیدا ہوئی ہے کہ تنازع سفارتی مذاکرات کی طرف بڑھ سکتا ہے۔

اس پیش رفت کے بعد برینٹ خام تیل کی قیمت 5.8 فیصد کمی کے ساتھ 91.20 ڈالر فی بیرل جبکہ ویسٹ ٹیکساس انٹرمیڈیٹ (WTI) خام تیل 5.5 فیصد کمی کے بعد 84.40 ڈالر فی بیرل پر آ گیا۔

رپورٹ کے مطابق گزشتہ ہفتے مشرق وسطیٰ میں بڑھتی ہوئی کشیدگی کے باعث خام تیل کی قیمت 100 ڈالر فی بیرل سے تجاوز کر گئی تھی، تاہم جنگی خدشات میں کمی کے بعد عالمی منڈی میں قیمتوں میں نمایاں گراوٹ ریکارڈ کی گئی۔

ماہرین کا کہنا ہے کہ اگر خطے میں کشیدگی مزید کم ہوئی اور سفارتی کوششیں کامیاب رہیں تو عالمی تیل مارکیٹ میں قیمتوں کا استحکام برقرار رہ سکتا ہے۔