ٹانک میں چیک پوسٹ پر حملہ کرنے والے فتنۃ الخوارج کے دہشتگردوں کا عبرت ناک انجام

پشاور: خیبرپختونخوا کے ضلع ٹانک میں چیک پوسٹ پر حملے کی کوشش کرنے والے مبینہ دہشت گرد سیکیورٹی فورسز کی کارروائی میں مارے گئے۔

سیکیورٹی ذرائع کے مطابق ٹانک کے علاقے مانجھی خیل میں پولیس اور پاک فوج کی مشترکہ چیک پوسٹ کو نشانہ بنانے کی کوشش کی گئی، تاہم فورسز نے بروقت کارروائی کرتے ہوئے حملہ ناکام بنا دیا۔

ذرائع کے مطابق جوابی کارروائی میں حملہ آور ہلاک ہوگئے۔ بعد ازاں ہلاک افراد کی لاشیں ٹانک کے مقامی علاقے میں منتقل کی گئیں، جہاں شہریوں کی جانب سے ان کے خلاف شدید ردعمل کا اظہار کیا گیا۔

مقامی افراد نے امن و امان خراب کرنے والے عناصر کے خلاف غم و غصے کا اظہار کرتے ہوئے کہا کہ دہشت گردی اور بدامنی سے متاثرہ عوام ایسے واقعات کے خاتمے کے خواہاں ہیں۔

حکام کے مطابق علاقے میں سیکیورٹی اقدامات مزید سخت کر دیے گئے ہیں۔