کیچ: بلیدہ تا عبدوئی سڑک منصوبہ سست روی کا شکار، عوام کا فوری تکمیل کا مطالبہ

کیچ: ساؤتھ بلوچستان پیکیج کے تحت بلیدہ سے نوانو اور عبدوئی بارڈر تک زیر تعمیر سڑک کا منصوبہ شدید سست روی کا شکار ہونے پر مقامی آبادی میں تشویش بڑھ گئی ہے۔ شہریوں نے حکومت بلوچستان اور متعلقہ حکام سے منصوبے کی جلد تکمیل کا مطالبہ کیا ہے۔

ذرائع کے مطابق تقریباً 30 سے 50 کلومیٹر طویل اس سڑک کی تعمیر کے لیے 2021 میں ساؤتھ بلوچستان پیکیج کے تحت تقریباً 8 ارب روپے مختص کیے گئے تھے، جبکہ منصوبے پر عملی کام کا آغاز تقریباً دو سال قبل کیا گیا۔

مقامی افراد کا کہنا ہے کہ منصوبے پر کام کی رفتار انتہائی سست ہے اور کئی کئی ماہ تک تعمیراتی سرگرمیاں مکمل طور پر معطل رہتی ہیں، جس کے باعث عوام کو شدید مشکلات کا سامنا ہے۔

اہلیانِ علاقہ کے مطابق یہ سڑک زامران کے متعدد دیہات کو تحصیل بلیدہ اور ضلع کیچ سے ملانے کے لیے نہایت اہم ہے، تاہم غیر معمولی تاخیر سے آمدورفت، تجارت اور روزمرہ زندگی متاثر ہو رہی ہے۔

مقامی شہریوں نے حکومت بلوچستان، محکمہ مواصلات و تعمیرات (بی اینڈ آر)، صوبائی وزیر منصوبہ بندی و ترقیات اور دیگر متعلقہ حکام سے مطالبہ کیا ہے کہ منصوبے میں بار بار آنے والے تعطل کا فوری نوٹس لیا جائے اور تعمیراتی کام تیز کرکے سڑک کو جلد مکمل کیا جائے تاکہ عوام کو بنیادی سفری سہولت میسر آ سکے۔