موٹروے پر خاتون سے اجتماعی زیادتی کے مقدمے میں لاہور ہائیکورٹ کا بڑا فیصلہ جاری

لاہور: لاہور ہائیکورٹ نے موٹروے پر خاتون سے اجتماعی زیادتی کے مقدمے میں مجرمان عابد علی اور شفقت عرف بگا کی سزائے موت کے خلاف اپیلیں مسترد کرتے ہوئے ٹرائل کورٹ کا فیصلہ برقرار رکھا ہے۔

دو رکنی بینچ جسٹس سید شہباز علی رضوی اور جسٹس طارق محمود باجوہ نے تفصیلی تحریری فیصلہ جاری کیا، جس میں قرار دیا گیا کہ ڈی این اے، میڈیکل اور فرانزک شواہد سے ملزمان کا جرم ثابت ہو چکا ہے۔

عدالت نے کہا کہ متاثرہ خاتون کا بیان قابل اعتماد شہادت ہے، جس کی تائید دیگر سائنسی شواہد سے بھی ہوتی ہے، جبکہ شناخت پریڈ کے دوران ملزمان کی درست شناخت بھی ہوئی۔

فیصلے میں کہا گیا کہ جرم کی سنگینی کے باعث کسی قسم کی رعایت نہیں دی جا سکتی، لہٰذا ٹرائل کورٹ کی جانب سے سنائی گئی سزائے موت میں مداخلت کی کوئی گنجائش نہیں۔

واضح رہے کہ 2020 میں لاہور کے قریب موٹروے پر پیش آنے والے واقعے میں دونوں ملزمان کو خصوصی عدالت نے مختلف دفعات کے تحت سزائیں سنائی تھیں، جنہیں لاہور ہائیکورٹ نے برقرار رکھا ہے۔