بلوچستان ڈویلپمنٹ اتھارٹی مرحلہ وار ختم کرنے کا فیصلہ

کوئٹہ: وزیراعلیٰ بلوچستان کی نگرانی میں بلوچستان ڈویلپمنٹ اتھارٹی (BDA) کی تنظیم نو اور مرحلہ وار خاتمے کا فیصلہ کر لیا گیا ہے۔

ذرائع کے مطابق 10 جولائی 2026 کو ہونے والے بی ڈی اے کمیٹی اجلاس میں ادارے کی اصلاحات، اثاثوں کی منتقلی اور ملازمین کے مستقبل سے متعلق مختلف تجاویز کی منظوری دی گئی۔

فیصلے کے مطابق بی ڈی اے کو آئندہ 18 ماہ کے دوران تین مراحل میں ختم کیا جائے گا، جبکہ ادارے کے منافع بخش اثاثوں کو الگ کارپوریٹ کمپنیوں میں منتقل کرنے کی تجویز بھی منظور کر لی گئی ہے۔

حکام کا کہنا ہے کہ اصلاحات کے دوران ملازمین کے حقوق کے تحفظ، اثاثوں کی منتقلی اور عبوری انتظامی نظام کے لیے جامع منصوبہ تیار کیا جائے گا۔

حکام کے مطابق اقدام کا مقصد ادارے کے وسائل کے بہتر استعمال اور ترقیاتی منصوبوں کی کارکردگی میں بہتری لانا ہے۔