بلوچستان،پل اور گیس پائپ لائن تباہ، گاڑیوں پر اندھا دھند حملہ، 9 افراد جاں بحق

کوئٹہ: بلوچستان کے مختلف اضلاع میں فائرنگ، دھماکوں، ٹریفک حادثات اور آتشزدگی کے واقعات میں کم از کم 9 افراد جاں بحق جبکہ 10 سے زائد زخمی ہوگئے۔

تفصیلات کے مطابق منگوچر میں فائرنگ کے مختلف واقعات میں ایک مریضہ سمیت دو خواتین جان کی بازی ہار گئیں، جبکہ سوراب میں ٹریفک حادثے میں تین افراد جاں بحق ہوئے۔

کوئٹہ میں آتشزدگی کے واقعے میں دو افراد جاں بحق ہوگئے، جبکہ مستونگ میں نامعلوم مسلح افراد نے مال بردار گاڑیوں کو نشانہ بنایا۔ دھماکوں کے باعث ایک پل اور گیس پائپ لائن کو بھی نقصان پہنچا۔

اس کے علاوہ مختلف اضلاع سے 6 افراد کی لاشیں برآمد ہونے کی اطلاعات بھی سامنے آئیں، جبکہ زخمیوں کو اسپتال منتقل کر دیا گیا۔

حکام کے مطابق تمام واقعات کی تحقیقات جاری ہیں اور متاثرہ علاقوں میں سیکیورٹی اقدامات مزید سخت کر دیے گئے ہیں۔