سردار اختر مینگل نے قومی اسمبلی کی تنخواہیں اور مراعات کی 78 لاکھ 92 ہزار 725 روپے رقم واپس کر دی

اسلام آباد: بلوچستان نیشنل پارٹی (بی این پی) کے سربراہ سردار اختر مینگل نے بطور رکن قومی اسمبلی ملنے والی تمام تنخواہیں اور مراعات سرکاری خزانے میں واپس کر دی ہیں۔

سردار اختر مینگل نے قومی اسمبلی سیکرٹریٹ کو 78 لاکھ 92 ہزار 725 روپے کا چیک جمع کرایا اور رقم کی واپسی سے متعلق خط بھی ارسال کیا۔

اپنے خط میں سردار اختر مینگل نے مؤقف اختیار کیا کہ وہ 3 ستمبر 2024 سے 11 فروری 2026 تک کی مدت کی تنخواہیں واپس کر رہے ہیں۔ ان کے مطابق استعفیٰ دینے کے بعد انہوں نے اپنے پارلیمانی بینک اکاؤنٹ سے کسی قسم کی تنخواہ یا الاؤنس استعمال نہیں کیا۔

انہوں نے قومی اسمبلی سیکرٹریٹ سے درخواست کی کہ پارلیمانی بینک اکاؤنٹ میں موجود تمام رقم سرکاری خزانے میں منتقل کی جائے۔

سردار اختر مینگل کا کہنا ہے کہ وہ عوامی خدمت میں شفافیت، دیانت داری اور احتساب کے اصولوں پر کاربند رہنے کے لیے پرعزم ہیں۔

واضح رہے کہ سردار اختر مینگل نے 3 ستمبر 2024 کو بلوچستان کے مسائل پر پارلیمنٹ کے کردار کے خلاف احتجاجاً این اے 256 خضدار کی نشست سے استعفیٰ دیا تھا، جو اسپیکر قومی اسمبلی نے 11 فروری 2026 کو منظور کیا۔