پی ٹی آئی کی لانگ مارچ ملتوی کرنے کی تجویز، اچکزئی کا صاف انکار

اسلام آباد: پی ٹی آئی قیادت کی جانب سے اپوزیشن لیڈر محمود خان اچکزئی سے لانگ مارچ اکتوبر تک مؤخر کرنے کے لیے رابطہ کیا گیا، تاہم اچکزئی نے مارچ ملتوی کرنے سے انکار کرتے ہوئے اپنے مؤقف پر قائم رہنے کا اعلان کیا ہے۔

ذرائع کے مطابق پی ٹی آئی قیادت نے محمود خان اچکزئی سے رابطہ کرکے پارلیمانی پارٹی کے اجلاس میں لانگ مارچ مؤخر کرنے کی تجویز سے آگاہ کیا اور اکتوبر تک مارچ ملتوی کرنے پر مشاورت کی۔

ذرائع کا کہنا ہے کہ محمود خان اچکزئی نے لانگ مارچ مؤخر کرنے سے اتفاق نہیں کیا اور کہا کہ 27 ستمبر کا مارچ اپنے مقررہ وقت پر ہوگا۔ ان کے مطابق اسی روز خیبرپختونخوا سمیت دیگر صوبوں میں تحریک کا آغاز کیا جائے گا، جو مرحلہ وار اسلام آباد کی جانب بڑھے گی۔

ذرائع کے مطابق لانگ مارچ مؤخر کرنے کے معاملے پر پی ٹی آئی قیادت اور محمود خان اچکزئی کے درمیان اختلاف برقرار ہے، جبکہ انہیں مؤقف تبدیل کرنے پر آمادہ کرنے کی کوششیں جاری ہیں۔

دوسری جانب لانگ مارچ کی نئی تاریخ کے حوالے سے پی ٹی آئی کی جانب سے دیگر اپوزیشن رہنماؤں سے بھی مشاورت جاری ہے۔