بلوچستان میں دہشتگردی حکومتی ناکامی کا ثبوت ہے، حافظ حمد اللہ

کوئٹہ ( )جمعیت علماء اسلام پاکستان کے مرکزی رہنما، سینیٹر مولانا حافظ حمد اللہ نے گزشتہ روز جامعہ امدادیہ میں بم دھماکے کے نتیجے میں کمسن طلبہ کی شہادت و زخمی ہونے اور کوئٹہ، ہنہ اوڑک اور زیارت سمیت بلوچستان کے مختلف علاقوں میں دہشت گردی کے پے درپے واقعات پر گہرے دکھ، افسوس اور شدید تشویش کا اظہار کرتے ہوئے کہا ہے کہ ایک ہی ہفتے کے دوران درجنوں بے گناہ شہریوں اور متعدد پولیس اہلکاروں کی شہادت صوبے میں امن و امان کی سنگین صورتحال اور حکومتی ناکامی کا واضح ثبوت ہے۔ انہوں نے کہا کہ معصوم طلبہ، شہریوں اور سکیورٹی اہلکاروں کا خون پوری قوم کے لیے باعثِ رنج ہے، مگر افسوس کہ متعلقہ حکام اب بھی حالات کو معمول کے مطابق ظاہر کرنے کی کوشش کر رہے ہیں۔ انہوں نے سوال اٹھایا کہ آخر وفاقی حکومت، وزیر اعظم، وفاقی وزیر داخلہ اور دیگر ذمہ دار ادارے بلوچستان کی مسلسل بگڑتی ہوئی صورتحال پر کب سنجیدہ توجہ دیں گے؟ کیا بلوچستان بھی پاکستان کا حصہ نہیں اور کیا یہاں کے بلوچ اور پشتون شہری ریاست کی ذمہ داری نہیں؟ انہوں نے کہا کہ صوبائی حکومت عوام کے جان و مال کے تحفظ میں بری طرح ناکام ہو چکی ہے، لہٰذا دہشت گردی کے حالیہ واقعات کی غیر جانبدارانہ تحقیقات کر کے اصل عناصر کو بے نقاب کیا جائے، شہداء کے لواحقین کی ہر ممکن داد رسی کی جائے اور بلوچستان میں امن و امان کے قیام کے لیے فوری، مؤثر اور عملی اقدامات کیے جائیں۔