کوئٹہ میں آٹا مزید مہنگا

کوئٹہ: صوبائی دارالحکومت کوئٹہ میں آٹے کی قیمتوں میں ایک بار پھر نمایاں اضافہ ہوگیا، جس کے باعث مہنگائی کے ستائے شہری، خصوصاً کم آمدنی اور یومیہ اجرت پر کام کرنے والے افراد، شدید مالی مشکلات کا شکار ہو گئے ہیں۔

مارکیٹ ذرائع کے مطابق 20 کلوگرام آٹے کے تھیلے کی قیمت بڑھ کر 3,200 روپے تک پہنچ گئی ہے، جو چند روز قبل کے مقابلے میں 400 روپے زیادہ ہے۔ اسی طرح فی کلو آٹے کی قیمت میں بھی تقریباً 20 روپے اضافہ ریکارڈ کیا گیا ہے۔

مارکیٹ میں 50 کلوگرام آٹے کا تھیلا تقریباً 7 ہزار روپے جبکہ 100 کلوگرام آٹے کی بوری 14 ہزار روپے تک فروخت ہو رہی ہے۔ دکانداروں کا کہنا ہے کہ مختلف برانڈز اور معیار کے لحاظ سے قیمتوں میں معمولی فرق ہے، تاہم مجموعی طور پر آٹے کی قیمتوں میں واضح اضافہ ہوا ہے۔

شہریوں نے آٹے کی بڑھتی ہوئی قیمتوں پر شدید تشویش کا اظہار کرتے ہوئے کہا کہ بجلی، گیس، پٹرول، چینی، گھی، دالوں اور سبزیوں کی مہنگائی پہلے ہی گھریلو بجٹ کو متاثر کر چکی ہے، جبکہ آٹے کی قیمت میں اضافے نے دو وقت کی روٹی کا حصول بھی مشکل بنا دیا ہے۔

فلور ملز اور آٹا ڈیلرز سے وابستہ تاجروں کے مطابق گندم کی مہنگی خریداری، ٹرانسپورٹ اخراجات اور دیگر پیداواری لاگت میں اضافے کے باعث آٹے کی قیمتیں بڑھی ہیں، تاہم اس حوالے سے حکومتی سطح پر تاحال کوئی باضابطہ وضاحت سامنے نہیں آئی۔

شہریوں نے حکومت بلوچستان، ضلعی انتظامیہ اور محکمہ خوراک سے مطالبہ کیا ہے کہ آٹے کی قیمتوں میں اضافے کا فوری نوٹس لیا جائے، ذخیرہ اندوزی اور ناجائز منافع خوری کے خلاف سخت کارروائی کی جائے اور سرکاری نرخوں پر آٹے کی فراہمی یقینی بنائی جائے۔