پارلیمانی تقاریر کی بلاامتیاز نشریات یقینی بنائی جائیں،مولانا عبد الرحمن رفیق

کوئٹہ ( )
جمعیت علماء اسلام ضلع کوئٹہ کے امیر مولانا عبد الرحمن رفیق، ضلعی جنرل سیکرٹری حاجی عین اللہ شمس، سینئر نائب امیر مولانا خورشید احمد، حاجی بشیر احمد کاکڑ، حافظ شبیر احمد مدنی، حاجی رحمت اللہ کاکڑ، سید حاجی عبدالواحد آغا، حافظ مسعود احمد، حاجی محمد قاسم خلجی، حاجی ولی محمد بڑیچ، صفی اللہ مینگل، شاہ زاہد مشوانی اور دیگر ضلعی رہنماؤں نے اپنے مشترکہ اخباری بیان میں کہا ہے کہ بجٹ سیشن کے دوران قائد جمعیت مولانا فضل الرحمٰن کی تقریر کو قومی ٹی وی چینلز پر بلیک آؤٹ کرنا بدترین آمریت ہے، اظہارِ رائے کی آزادی پر قدغن اور جمہوری اقدار کی کھلی خلاف ورزی ہے۔ انہوں نے کہا کہ حکومت عوام کو حقائق سے دور رکھنے اور ملک کے ایک سینئر ترین، مدبر اور عوامی رہنما کی آواز دبانے کی ناکام کوشش کر رہی ہے۔ مولانا فضل الرحمٰن نے ہمیشہ قومی مسائل، عوامی مشکلات، معیشت کی بہتری اور پارلیمانی بالادستی کے لیے مثبت اور تعمیری تجاویز پیش کی ہیں، لیکن ان کی تقریر نشر نہ کرنا اس بات کا ثبوت ہے کہ حکمران تنقید برداشت کرنے کا حوصلہ کھو چکے ہیں۔ انہوں نے کہا کہ اختلافی آوازوں کو دبانے سے مسائل حل نہیں ہوں گے بلکہ جمہوری نظام مزید کمزور ہوگا۔ انہوں نے کہا کہ اس غیر جمہوری طرزِ عمل کی وضاحت کی جائے اور مستقبل میں پارلیمنٹ کے تمام اراکین کی تقاریر کو بلاامتیاز عوام تک پہنچانے کو یقینی بنایا جائے۔