مسلم باغ ہڑتال ختم: تاجر برادری، چیمبر آف کامرس اور ٹرانسپورٹرز کے مطالبات تسلیم، حکومت سے مذاکرات کامیاب

مسلم باغ: تاجر برادری، چیمبر آف کامرس اور ٹرانسپورٹرز کے نمائندہ وفد اور حکومتی حکام کے درمیان ہونے والے تفصیلی مذاکرات کامیاب ہو گئے، جس کے بعد جاری ہڑتال ختم کرنے کا اعلان کر دیا گیا۔

ذرائع کے مطابق مذاکرات کے دوران حکومت نے تاجر برادری اور ٹرانسپورٹرز کے تمام جائز مطالبات تسلیم کر لیے ہیں۔ معاہدے کے بعد ہڑتال ختم کرنے والی کمیٹی کے اراکین نے پریس کلب مسلم باغ میں میڈیا سے گفتگو کرتے ہوئے کہا کہ احتجاج کے دوران عوام، مسافروں، ڈرائیورز اور تاجروں نے صبر و تحمل کا مظاہرہ کیا جس پر وہ ان کے شکر گزار ہیں۔

کمیٹی کے مطابق حکومتی یقین دہانیوں پر مکمل اعتماد کرتے ہوئے شاہراہ کو فوری طور پر کھول دیا گیا ہے تاکہ ٹریفک کی روانی بحال ہو سکے۔ رہنماؤں نے کہا کہ عوامی مسائل کے حل کے لیے مذاکراتی عمل کو ترجیح دینا خوش آئند ہے۔

مزید کہا گیا کہ آئندہ بھی عوامی مفاد میں مذاکرات اور پرامن جدوجہد کا راستہ اپنایا جائے گا۔