کوئٹہ: سول ہسپتال کے آرتھوپیڈ وارڈ میں نامعلوم افراد نے لیڈی ڈاکٹر پر تیزاب پھینک دیا

کوئٹہ: کوئٹہ میں تیزاب حملے کا شکار ہونے والی ڈاکٹر ماہ نور کی حالت تشویشناک بتائی جا رہی ہے۔ ذرائع کے مطابق حملے کے نتیجے میں ان کا چہرہ تقریباً 70 فیصد تک جھلس گیا ہے جبکہ ایک آنکھ بھی شدید متاثر ہوئی ہے اور اس کے ضائع ہونے کی اطلاعات ہیں۔

ڈاکٹر ماہ نور کو ابتدائی طبی امداد کے بعد مزید بہتر اور خصوصی علاج کی فراہمی کے لیے کراچی منتقل کیا جا رہا ہے، جہاں ماہر ڈاکٹرز ان کا علاج کریں گے۔

اس افسوسناک اور دلخراش واقعے نے طبی برادری اور عوامی حلقوں میں شدید تشویش اور غم و غصے کی لہر دوڑا دی ہے۔ مختلف سماجی، انسانی حقوق اور طبی تنظیموں نے واقعے کی مذمت کرتے ہوئے ذمہ دار ملزم کی فوری گرفتاری اور سخت قانونی کارروائی کا مطالبہ کیا ہے۔

شہریوں کا کہنا ہے کہ خواتین اور پیشہ ور افراد کے خلاف ایسے سنگین جرائم کی روک تھام کے لیے مؤثر اقدامات اور ملزمان کو عبرتناک سزا دی جانی چاہیے تاکہ مستقبل میں ایسے واقعات کا سدباب ممکن ہو سکے۔