کوئٹہ میں آوارہ کتوں کا راج، شہری شدید عدم تحفظ کا شکار

کوئٹہ میں آوارہ کتوں کی بے تحاشا افزائش نے شہریوں کا جینا دوبھر کر دیا ہے۔ شہر کے مختلف علاقوں میں روزانہ کی بنیاد پر درجنوں شہری آوارہ کتوں کے حملوں کا شکار ہو رہے ہیں، جن میں اکثریت خواتین اور معصوم بچوں کی ہے۔
محکمہ صحت کی غیر سرکاری رپورٹس کے مطابق، صرف پچھلے دو ماہ کے دوران شہر میں تقریباً 320 سے زائد افراد کو کتوں نے کاٹا، جن میں 60 فیصد بچے اور 25 فیصد خواتین شامل ہیں۔ مقامی آبادی کے مطابق یہ تعداد اس سے بھی زیادہ ہو سکتی ہے، کیونکہ کئی واقعات رپورٹ ہی نہیں ہوتے۔
شہر کے جن علاقوں سے آوارہ کتوں کے حملوں کی سب سے زیادہ شکایات موصول ہوئی ہیں، ان میں نچاری روڈ، کاسی روڈ، سرکی روڈ، سیٹلائٹ ٹاؤن، سریاب روڈ، جناح ٹاؤن
اور ان کے ملحقہ علاقے شامل ہیں، جہاں اسکول، بازار اور رہائشی بستیاں کتوں کے جھنڈ کی وجہ سے مسلسل خوف کی فضا کا شکار ہیں۔
والدین کا کہنا ہے کہ اسکول جانے والے بچوں کی حفاظت سب سے بڑا مسئلہ بن چکا ہے۔ متعدد واقعات میں خواتین پر شام کے وقت گھروں کے باہر یا مارکیٹ سے واپسی پر حملے کیے گئے۔
عوام نے ایڈمنسٹریٹر میٹروپولیٹن کارپوریشن، ڈپٹی کمشنر، کمشنر اور صوبائی حکومت سے مطالبہ کیا ہے کہ فوری طور پر مؤثر حکمتِ عملی مرتب کی جائے، آوارہ کتوں کے لیے مستقل اور انسانی بنیادوں پر مبنی حل نکالا جائے، اور شہریوں کو عدم تحفظ کی اس کیفیت سے نجات دلائی جائے۔
شہریوں نے خبردار کیا ہے کہ اگر اقدامات نہ کیے گئے تو یہ مسئلہ نہ صرف صحتِ عامہ بلکہ سماجی سلامتی کا بھی بڑا چیلنج بن جائے گا۔