پانی کی قلت کے حل کے لیے ہنگامی اقدامات کیے جائیں، محمد انور کاکڑ

کوئٹہ: ڈسٹرکٹ واٹر بورڈ کمیٹی کا ایک اہم اجلاس ایڈیشنل ڈپٹی کمشنر (جنرل) محمد انور کاکڑ کی زیر صدارت منعقد ہوا۔ اجلاس میں ضلع بھر میں پانی کی فراہمی، درپیش مسائل اور ان کے حل کے لیے مختلف امور پر تفصیلی غور و خوض کیا گیا۔

اجلاس میں تمام متعلقہ اسسٹنٹ کمشنرز، واسا، پی ایچ ای (پبلک ہیلتھ انجینئرنگ) اور ایریگیشن ڈیپارٹمنٹ کے نمائندگان نے شرکت کی۔ اس موقع پر مختلف علاقوں میں پانی کی قلت، سپلائی سسٹم کی بہتری، غیر قانونی کنکشنز کے خاتمے اور پانی کے ضیاع کو روکنے کے حوالے سے اقدامات پر تبادلہ خیال کیا گیا۔

ایڈیشنل ڈپٹی کمشنر (جنرل) محمد انور کاکڑ نے ہدایت کی کہ تمام متعلقہ محکمے باہمی رابطے کو مزید مؤثر بنائیں اور عوام کو صاف پانی کی فراہمی یقینی بنانے کے لیے ہنگامی بنیادوں پر اقدامات کریں۔ انہوں نے کہا کہ پانی کی منصفانہ تقسیم اور سپلائی نظام کی بہتری ضلعی انتظامیہ کی اولین ترجیحات میں شامل ہے۔