عوامی سہولت اولین ترجیح ہے، ترقیاتی کام تیز کریں گے،وزیر اعلیٰ بلوچستان

کوئٹہ (نامہ نگار) سیاسی و سماجی رہنما ارسلان شیر نے وزیر اعلیٰ بلوچستان میر سرفراز بگٹی سے ملاقات کی، جس میں صوبے کی موجودہ ترقیاتی و انتظامی صورتحال پر تبادلہ خیال کیا گیا۔

اس موقع پر ارسلان شیر نے وزیر اعلیٰ بلوچستان کی کارکردگی کو سراہتے ہوئے کہا کہ انہوں نے کم عرصے میں کوئٹہ کی شکل بدل دی ہے اور شہر کی سڑکیں اور اسپتال ان کے وژن کی واضح عکاسی کرتے ہیں۔ انہوں نے کہا کہ میر سرفراز بگٹی ایک مہذب اور باوقار قبائلی شخصیت ہیں، جن کی عاجزی کا مظاہرہ حالیہ دورہ پشین میں بزرگ شہریوں سے احترام کے ساتھ ملنے سے ظاہر ہوتا ہے۔

ارسلان شیر کا کہنا تھا کہ ماضی کے ادوار میں ترقیاتی کاموں کی رفتار سست رہی، تاہم موجودہ حکومت نے مختصر وقت میں نمایاں اقدامات کیے۔ انہوں نے بیکڑ کو ماڈرن ضلع بنانے، تعلیمی و صحت کے نظام میں بہتری لانے اور اساتذہ کی حاضری یقینی بنانے جیسے اقدامات کو قابلِ ستائش قرار دیا۔

انہوں نے مزید کہا کہ کوئٹہ میں سڑکوں کی مرمت اور نئی سڑکوں کی تعمیر سے ٹریفک کے مسائل میں کمی آئے گی جبکہ اسپتالوں میں صفائی اور ڈاکٹروں کی بروقت حاضری سے عوام کو بہتر طبی سہولیات میسر آئیں گی۔

ارسلان شیر نے کہا کہ وزیر اعلیٰ بلوچستان کی پالیسیوں میں شفافیت، بہتر منصوبہ بندی اور عوامی ضروریات کو ترجیح دی جا رہی ہے، جس سے صوبے میں ترقی، خوشحالی اور عوامی اعتماد میں اضافہ ہو رہا ہے۔