بلوچستان میں اسلحہ رکھنے پر مکمل پابندی : امن و امان پر سمجھوتہ نہیں ہوگا،ضیاء لانگو

صوبائی وزیر داخلہ میر ضیاء اللہ لانگو نے واضح کیا ہے کہ بلوچستان میں امن و امان کی صورتحال پر کسی قسم کا کوئی سمجھوتہ نہیں کیا جائے گا اور ریاست نے مستقل قیام امن کے لیے انتہائی سخت فیصلے کر لیے ہیں۔ پیر کے روز سول سیکرٹریٹ کوئٹہ میں ایڈیشنل چیف سیکرٹری داخله محمد حمزہ شفقات اور معاون برائے وزیر داخله بابر یوسفزئی کے ہمراہ پریس کانفرنس کرتے ہوئے انہوں نے کہا کہ دہشت گردوں کے خلاف بلا امتیاز کارروائی جاری رہے گی اور حکومت ہر دہشت گرد کے آخری ٹھکانے تک جائے گی کیونکہ شہریوں کے جان و مال کاتحفظ ہماری اولین ترجیح ہے۔ وزیر داخلہ نے اعلان کیا کہ وزیر اعلی بلوچستان کی خصوصی ہدایات کی روشنی میں ریاست اور ریاستی اداروں کے علاوہ صوبے میں کسی کو بھی اسلحہ رکھنے کی اجازت نہیں ہوگی اور عوام کو ہتھیار رکھنے سے روکنے کے لیے باقاعده احکامات جاری کر دیے گئے ہیں۔