کراچی میں آج دوپہر کے بعد گرج چمک کے ساتھ بارش کا امکان

کراچی: محکمہ موسمیات نے پیشگوئی کی ہے کہ شہر قائد میں آج دوپہر کے بعد گرج چمک کے ساتھ بارش کا امکان ہے، جبکہ اس دوران تیز اور جھکڑ چلنے والی ہوائیں بھی متوقع ہیں۔

محکمہ موسمیات کے مطابق ہواؤں کی رفتار 50 کلومیٹر فی گھنٹہ تک جا سکتی ہے اور بعض علاقوں میں ژالہ باری کا بھی امکان ظاہر کیا گیا ہے۔

حکام کا کہنا ہے کہ جمعہ کے روز موسم زیادہ تر گرم اور خشک رہنے کا امکان ہے، تاہم ہفتے کو مغربی سسٹم کا نیا اسپیل کراچی میں بارشوں کا باعث بنے گا۔

ترجمان محکمہ موسمیات انجم نذیر ضیغم کے مطابق یہ مغربی سسٹم کراچی سمیت سندھ کے مختلف علاقوں پر 29 مارچ تک اثر انداز رہ سکتا ہے۔

درجہ حرارت کے حوالے سے بتایا گیا ہے کہ آج شہر میں زیادہ سے زیادہ درجہ حرارت 32 سے 34 ڈگری سینٹی گریڈ تک رہنے کی توقع ہے، جبکہ کم سے کم درجہ حرارت 24 ڈگری سینٹی گریڈ ریکارڈ کیا گیا۔