لاہور ہائیکورٹ؛ پی ایم ڈی سی کے مقررہ تجربہ کے برعکس بھرتیوں کا معیار غیر قانونی قرار

لاہور ہائیکورٹ نے اسسٹنٹ پروفیسر نیورو سرجری کی بھرتیوں کے لیے پاکستان میڈیکل اینڈ ڈینٹل کونسل (پی ایم ڈی سی) کے مقررہ معیار کے برعکس اہلیت کی شرائط کو غیر قانونی قرار دے دیا۔

جسٹس شیریں عمران نے ڈاکٹر سید شاہ رخ حسن رضوی سمیت 11 درخواست گزاروں کی درخواستوں پر فیصلہ جاری کیا۔ عدالت نے قرار دیا کہ پنجاب حکومت کے سروس رولز وفاقی قانون کے تحت مقرر کردہ کم از کم پیشہ ورانہ معیار کو ختم نہیں کرسکتے۔

عدالتی فیصلے کے مطابق اسسٹنٹ پروفیسر نیورو سرجری کے عہدے کے لیے متعلقہ شعبے میں کم از کم دو سال کا کلینیکل تجربہ اور دو تحقیقی مقالے لازمی ہیں۔ عدالت نے متنازع اشتہار میں اہلیت کی متضاد شرائط کو غیر قانونی قرار دیتے ہوئے بھرتیوں کا عمل پی ایم ڈی سی کے 2025 کے ضوابط کے مطابق مکمل کرنے کا حکم دیا۔

فیصلے میں واضح کیا گیا کہ ابتدائی بھرتیوں اور ترقیوں کے لیے مقررہ کوٹہ برقرار رہے گا۔