مشرقِ وسطیٰ کی 40 پروازیں آج بھی منسوخ

ملک بھر میں آج بھی مشرقِ وسطیٰ جانے والی 40 پروازیں منسوخ کر دی گئیں، جبکہ بعض روٹس پر جزوی بہتری بھی دیکھنے میں آئی ہے۔

تفصیلات کے مطابق دوحہ سے کراچی، لاہور اور اسلام آباد کے لیے پروازیں اپنے شیڈول کے مطابق جاری رہیں، اور Qatar Airways کے فلائٹ آپریشن میں بہتری ریکارڈ کی گئی ہے۔

دوسری جانب کراچی سے دوحہ، بحرین، ابوظہبی اور دبئی جانے والی 13 پروازیں منسوخ ہوئیں۔ لاہور، اسلام آباد اور پشاور سے فجیرہ جانے والی 8 پروازوں کو العین منتقل کر دیا گیا، جبکہ العین سے ان شہروں کے لیے 10 پروازیں چلائی جا رہی ہیں۔

شہر وار صورتحال کے مطابق لاہور سے 8، اسلام آباد سے 7، پشاور سے 10 جبکہ ملتان سے مشرقِ وسطیٰ کی 2 پروازیں منسوخ کی گئیں۔

رپورٹس کے مطابق گزشتہ 20 روز کے دوران جنگی صورتحال کے باعث ملک بھر سے مجموعی طور پر 1810 پروازیں منسوخ ہو چکی ہیں، جس سے فضائی آپریشن شدید متاثر ہوا ہے۔