بلوچستان میں تباہی کا بڑا منصوبہ ناکام، خاتون خودکش بمبار گرفتار

بلوچستان میں سیکیورٹی فورسز نے بڑی کامیابی حاصل کرتے ہوئے کالعدم دہشتگرد تنظیم بی ایل اے کی خاتون خودکش بمبار کو گرفتار کر لیا، جس سے کئی معصوم جانیں بچائی گئیں۔

وزیراعلیٰ بلوچستان سرفراز بگٹی نے پریس کانفرنس میں سیکیورٹی اداروں کی کارکردگی کو سراہا اور کہا کہ دہشتگرد ایک معصوم لڑکی کو خودکش حملے کے لیے استعمال کر رہے تھے، جسے بروقت گرفتار کر کے بڑے حادثے کو روکا گیا۔

ان کا کہنا تھا کہ بلوچستان کے عوام دہشتگردی کو قبول نہیں کرتے اور سیکیورٹی فورسز نے صوبے کو محفوظ بنانے میں اہم کردار ادا کیا ہے۔ انہوں نے بلوچ خواتین کے استحصال اور بلوچ لبریشن آرمی اور بشیر زیب گروپ کی کارروائیوں پر بھی تشویش ظاہر کی۔

وزیراعلیٰ نے مزید کہا کہ خواتین سے متعلق معاملات صرف لیڈیز پولیس کے ذریعے نمٹائے جائیں گے اور عوام کی حساس معلومات کی بنیاد پر سیکیورٹی مزید مضبوط کی جا رہی ہے۔ بلوچستان میں سیکیورٹی کو مزید بہتر بنانے کے لیے ایف سی کی تین مزید بٹالین طلب کی گئی ہیں، جبکہ افغانستان دہشتگردوں کے لیے محفوظ پناہ گاہ ہے۔

انہوں نے کہا کہ نوجوانوں کو دہشتگردی سے بچانا حکومت کی ترجیح ہے، میرٹ پر بھرتیاں جاری ہیں اور 12 ہزار سے زائد اساتذہ کو بھرتی کیا جا چکا ہے۔ آئین کے مطابق مذاکرات صرف انہی عناصر سے ممکن ہیں جو بات چیت کے لیے تیار ہوں۔