ڈیجیٹل ترقی کے لیے مضبوط سائبر سکیورٹی ناگزیر ہے، شزہ فاطمہ خواجہ

وفاقی وزیر برائے انفارمیشن ٹیکنالوجی و ٹیلی کمیونیکیشن Shiza Fatima Khawaja نے کہا ہے کہ ملک میں ڈیجیٹل ترقی اور بیرونی سرمایہ کاری میں مکمل اعتماد پیدا کرنے کے لیے مضبوط سائبر سکیورٹی نظام قائم کرنا ناگزیر ہے۔

انہوں نے بتایا کہ 32 سے زائد سرکاری خدمات کو مکمل طور پر ڈیجیٹل بنایا جا چکا ہے اور موبائل ایپس کے ذریعے نادرا کی دستاویزات تک رسائی ممکن ہو رہی ہے۔

سائبر سکیورٹی سے متعلق ایک تقریب سے خطاب میں شزہ فاطمہ خواجہ نے کہا کہ ملک کے قوانین، پالیسیوں اور نظام کو سائبر سکیورٹی کے لحاظ سے مزید مضبوط بنانا ضروری ہے تاکہ بیرونی سرمایہ کاری اور کاروباری مواقع میں اعتماد قائم ہو سکے۔

انہوں نے کہا کہ سائبر سکیورٹی صرف ٹیکنالوجی کا معاملہ نہیں بلکہ یہ ہر شہری کی ذاتی شناخت، سلامتی، گھروں اور خاندانوں کی حفاظت اور قومی سلامتی سے بھی جڑا ہوا ہے۔

وفاقی وزیر نے یہ بھی کہا کہ دنیا تیزی سے ڈیجیٹلائزیشن کی طرف بڑھ رہی ہے، خاص طور پر صحت کے شعبے میں جدید ٹیکنالوجیز استعمال ہو رہی ہیں، لیکن ڈیٹا کے غلط استعمال کے خطرات بھی بڑھ رہے ہیں۔ انہوں نے کہا کہ اگر کسی کے پاس جینیاتی ڈیٹا تک رسائی ہو تو اس کے غلط استعمال کے امکانات پیدا ہو سکتے ہیں، اسی لیے مضبوط سائبر سکیورٹی لازمی ہے۔

شزہ فاطمہ خواجہ نے کہا کہ حکومت سائبر سکیورٹی نظام کو مضبوط بنانے کے لیے اقدامات کر رہی ہے، جس میں سائبر سکیورٹی ایکٹ اور متعلقہ اداروں کو فعال بنانے پر کام جاری ہے۔ انہوں نے مزید کہا کہ مختلف مہارتوں اور وسائل کی فراہمی کے ذریعے پاکستان کو ڈیجیٹل معیشت میں محفوظ اور مستحکم بنایا جائے گا۔