کوئٹہ کے ترقیاتی منصوبوں کی بروقت تکمیل یقینی بنائی جائے،بلوچستان ہائیکورٹ

)بلوچستان ہائی کورٹ میں کوئٹہ کے ترقیاتی منصوبوں سے متعلق آئینی درخواست کی سماعت ہوئی، جس کی سربراہی چیف جسٹس محمد کامران خان ملاخیل نے کی اور دو رکنی بینچ نے پیش رفت رپورٹ طلب کر لی۔عدالت کو وزیراعلی پیکج کے تحت کوئٹہ کے امداد چوک اور ملحقہ سڑکوں کی تعمیر و بحالی کے کام کی تفصیلات پیش کی گئیں۔ رپورٹ کے مطابق گاہی خان چوک فلائی اوور 98 فیصد مکمل ہو چکا ہے جبکہ کسٹم فلائی اوور پر تعمیراتی کام 4 فیصد تک پہنچا ہے۔ مقامی زمینداروں کے مسائل کی وجہ سے تعمیراتی کام میں تاخیر دیکھنے میں آئی ہے۔ عدالت نے ڈپٹی کمشنر کوئٹہ کو معاملہ حل کرنے کی ہدایت کی۔بلوچستان ہائی کورٹ نے سریاب روڈ سروس کوریڈور کی بروقت تکمیل اور آئندہ سماعت پر رپورٹ جمع کرانے کی بھی ہدایت کی۔ اس کے علاوہ عالمو چوک فلائی اوور منصوبے کو ون وے سے ڈبل وے پل میں تبدیل کرنے کا فیصلہ کیا گیا، جس کے فزیبلٹی اور ڈیزائننگ کا عمل جاری ہے۔ عدالت نے حکام کو عالمو چوک فلائی اوور کی منظوری اور تکمیل کے عمل کو تیز کرنے کی ہدایت دی۔ہاکی چوک سے سریاب ریلوے کراسنگ اور زرغون روڈ کی تعمیر کے بعد نئی سڑکوں پر تجارتی سرگرمیوں اور نئی تعمیرات پر پابندی برقرار رکھنے کے احکامات بھی جاری کیے گئے ہیں۔ عدالت نے کمشنر اور ڈپٹی کمشنر کوئٹہ کو عدالتی احکامات پر سختی سے عمل درآمد یقینی بنانے کی ہدایت کی۔رپورٹ میں بتایا گیا کہ سوئی سدرن گیس کمپنی کے مطابق گیس لائن منتقلی کے مسائل حل ہو چکے ہیں۔ عدالت نے سرکاری افسران، ایڈیشنل ایڈووکیٹ جنرل اور درخواست گزار سید نذیر آغا ایڈووکیٹ کی کوششوں کو سراہا۔بلوچستان ہائی کورٹ نے متعلقہ حکام کو ہدایت دی کہ تمام منصوبوں کی بروقت تکمیل یقینی بنائی جائے اور کیس کی مزید سماعت 12 مارچ 2026 تک ملتوی کر دی گئی۔ عدالت نے حکم نامہ ایڈووکیٹ جنرل آفس کو ارسال کرنے کی ہدایت بھی کی۔