پاکستان، افغانستان تنازعے پر متنازع ویڈیو: ’انڈیا سے جنگ کے دوران آپ نے اچھا مواد بنایا لیکن یہ بالکل بھی مزاحیہ نہیں‘

’افغانیو پاکستان پر حملہ کرو گے۔ او تمھارے پاس ایئر فورس بھی ہے۔ اچھا جی۔۔۔ تم جنگیں بھی لڑتے ہو۔‘

پاکستان اور افغانستان کے درمیان جمعرات اور جمعے کی شب ہونے والی سرحدی جھڑپوں کے دوران طنز پر مبنی یہ ویڈیو سوشل میڈیا پر وائرل ہو رہی ہے جسے شدید تنقید کا سامنا ہے۔

32 سیکنڈ دورانیے کی یہ ویڈیو وزیرِ اعظم پاکستان کے میڈیا کوآرڈینیٹر بدر شہباز وڑائچ نے شیئر کی جسے پھر وفاقی وزیر اطلاعات عطا تارڑ نے بھی اپنے ایکس ہینڈل پر پوسٹ کیا۔

عطار تارڑ نے ایکس پر لکھا کہ ’پاکستان کے نوجوانوں میں حب الوطنی کا الگ جذبہ ہے۔ وہ ہر حال میں مزاح تلاش کرتے ہیں۔‘

جمعرات اور جمعے کی درمیانی شب دونوں ممالک کے درمیان ہونے والی لڑائی میں جہاں متضاد دعوے سامنے آتے رہے وہیں ایک دوسرے پر الزامات کی بوچھاڑ بھی ہوتی رہی۔

وزیر اطلاعات عطا تارڑ رات دیر گئے تک پاکستان کی ’جوابی کارروائی‘ سے متعلق تفصیلات شیئر کرتے رہے جبکہ پاکستان میں ایکس پر افغانستان سے متعلق مختلف ہیش ٹیگز بھی ٹرینڈ کرتے رہے۔

سوشل میڈیا پر صارفین جنگ کے ماحول میں اس نوعیت کے طنز پر تنقید کرتے ہوئے اسے قابلِ اعتراض قرار دے رہے ہیں۔

اس ویڈیو پر تنقید کرنے والوں میں سابق وزیر اطلاعات فواد چوہدری بھی شامل ہیں، جنھوں نے ایکس پر لکھا کہ ’یہ مزاح نہیں، یہ اخلاق سے گرا ہوا مواد ہے جسے ہٹا دینا چاہیے۔ براہ کرم مواد بنانے کے لیے پیشہ ور افراد کی خدمات حاصل کریں اور اس نسل پرستانہ، سستی تھرڈ کلاس ریل کو ہٹا دیں۔‘