او آئی سی کی حوثی حملوں کی شدید مذمت، سعودی حکومت کی بھرپور حمایت کا اعلان

اسلام آباد (ویب ڈیسک) اسلامی تعاون تنظیم (او آئی سی) نے سعودی عرب کے جنوبی علاقوں پر حوثیوں کے حملوں کی شدید مذمت کرتے ہوئے مملکت کی سلامتی، خودمختاری اور علاقائی استحکام کے لیے اپنی غیرمتزلزل حمایت کا اعادہ کیا ہے۔

او آئی سی کے سیکریٹری جنرل حسین ابراہیم طہٰ نے اپنے بیان میں کہا کہ سعودی عرب کے جنوبی علاقوں کو نشانہ بنانا مملکت کی سلامتی اور استحکام کو نقصان پہنچانے کی کوشش ہے۔

انہوں نے خبردار کیا کہ حوثیوں کی جانب سے اس نوعیت کی کارروائیوں کا تسلسل خطرناک اور ناقابل قبول اشتعال انگیزی ہے، جو یمن میں جنگ بندی برقرار رکھنے اور خطے میں امن و استحکام کے لیے جاری علاقائی و بین الاقوامی کوششوں کو نقصان پہنچا سکتا ہے۔

حسین ابراہیم طہٰ کے مطابق یہ حملے ریاستوں کی خودمختاری اور علاقائی سالمیت کے احترام سے متعلق بین الاقوامی قوانین اور معاہدوں کی بھی خلاف ورزی ہیں۔ انہوں نے کہا کہ ایسے اقدامات یمن کے بحران کے جامع اور مستقل سیاسی حل کی کوششوں میں رکاوٹ بن سکتے ہیں۔

او آئی سی کے سیکریٹری جنرل نے سعودی عرب کے ساتھ مکمل یکجہتی کا اظہار کرتے ہوئے کہا کہ تنظیم مملکت کی جانب سے اپنی قومی سلامتی کے تحفظ اور شہریوں و رہائشیوں کی حفاظت کے لیے کیے جانے والے اقدامات کی حمایت کرتی ہے۔

انہوں نے تمام متعلقہ فریقوں پر زور دیا کہ خطے کو مزید کشیدگی اور بدامنی سے بچانے کے لیے مذاکرات کو ترجیح دیں اور امن عمل کے ساتھ سنجیدہ وابستگی کا مظاہرہ کریں۔