مسلم لیگ ن کے ڈاکٹر نجیب نقی آزاد کشمیر کے نئے صدر منتخب

مظفرآباد: پاکستان مسلم لیگ (ن) کے نامزد امیدوار ڈاکٹر نجیب نقی 32 ووٹ حاصل کرکے آزاد جموں و کشمیر کے 25ویں صدر منتخب ہوگئے۔

صدارتی انتخاب آزاد جموں و کشمیر قانون ساز اسمبلی میں ہوا، جہاں ڈاکٹر نجیب نقی کا مقابلہ پاکستان پیپلز پارٹی کے امیدوار چوہدری لطیف اکبر سے تھا۔ چوہدری لطیف اکبر نے 13 ووٹ حاصل کیے، جبکہ ایک رکن غیر حاضر رہا۔

پولنگ دوپہر ایک بجے تک جاری رہی۔ انتخابی عمل مکمل ہونے کے بعد ڈاکٹر نجیب نقی کی بطور صدر حلف برداری بھی آج ہی متوقع ہے۔

ڈاکٹر نجیب نقی کا تعلق پونچھ ڈویژن کے حلقہ سدھنوتی، پلندری سے ہے۔ وہ ماضی میں آزاد کشمیر کے وزیر صحت بھی رہ چکے ہیں۔

وزیراعظم شہباز شریف نے ڈاکٹر نجیب نقی کو صدر آزاد کشمیر منتخب ہونے پر مبارکباد دیتے ہوئے نیک خواہشات کا اظہار کیا اور امید ظاہر کی کہ وہ اپنی آئینی ذمہ داریاں احسن انداز میں ادا کریں گے۔