نادرا کا شناختی کارڈ بلاک کرنا غیرقانونی قرار، بلوچستان ہائیکورٹ کا بڑا حکم

بلوچستان ہائیکورٹ کے ڈویژن بینچ نے نادرا کی جانب سے درخواست گزاروں کے شناختی کارڈز بلاک کرنے کے معاملے پر اہم فیصلہ سناتے ہوئے اقدام کو غیرقانونی قرار دے دیا اور بلاک کیے گئے شناختی کارڈز فوری طور پر بحال کرنے کا حکم جاری کردیا۔

درخواست گزاروں، جن میں مہر علی اور دیگر شامل ہیں، کی جانب سے سپریم کورٹ کے وکیل جمیل رمضان دیہوار ایڈووکیٹ نے عدالت میں دلائل پیش کیے۔ وکیل نے مؤقف اختیار کیا کہ کسی شہری کا شناختی کارڈ بلاک کرنے سے قبل نادرا کے لیے قانونی تقاضے پورے کرنا ضروری ہے، جبکہ متاثرہ شہری کو وضاحت پیش کرنے اور اپنا مؤقف بیان کرنے کا مناسب موقع بھی دیا جانا چاہیے۔

عدالت میں درخواست گزاروں کے وکیل نے مؤقف اپنایا کہ شناختی کارڈز بلاک کیے جانے سے شہریوں کے بنیادی حقوق متاثر ہوئے اور انہیں شوکاز نوٹس جاری کرکے مؤقف پیش کرنے کا مناسب موقع فراہم نہیں کیا گیا۔

عدالت نے فریقین کے دلائل اور آئینی و قانونی نکات کا جائزہ لینے کے بعد نادرا کی جانب سے شناختی کارڈز بلاک کرنے کے اقدام کو کالعدم قرار دیتے ہوئے متعلقہ شناختی کارڈز فوری طور پر بحال کرنے کا حکم دے دیا۔

درخواست گزاروں کے وکیل جمیل رمضان دیہوار ایڈووکیٹ کے مطابق فیصلے سے شہریوں کے بنیادی حقوق اور قانونی طریقہ کار کی اہمیت مزید واضح ہوئی ہے۔