بلوچستان میں بڑا فیصلہ، 30 روز کے لیے دفعہ 144 نافذ

 بلوچستان حکومت نے صوبے بھر میں 23 ستمبر سے 30 روز کے لیے دفعہ 144 نافذ کردی، جس کے تحت عوامی مقامات پر متعدد سرگرمیوں پر پابندی عائد کردی گئی ہے۔

محکمہ داخلہ بلوچستان کے مطابق عوامی مقامات پر اسلحے کی نمائش اور اسلحے سے متعلق سرگرمیوں پر پابندی ہوگی، جبکہ پانچ یا اس سے زائد افراد کے اجتماعات، دھرنوں، ریلیوں، مظاہروں اور اسی نوعیت کی سرگرمیوں کی بھی اجازت نہیں ہوگی۔

حکومت نے عوامی مقامات پر چہرہ ڈھانپنے، نقاب کرنے یا ایسا کوئی ذریعہ استعمال کرنے پر بھی پابندی عائد کی ہے جس سے کسی شخص کی شناخت میں رکاوٹ پیدا ہو۔

محکمہ داخلہ نے تمام قانون نافذ کرنے والے اداروں اور ضلعی انتظامیہ کو دفعہ 144 پر سختی سے عملدرآمد یقینی بنانے کی ہدایت کی ہے۔

حکام کے مطابق پابندیوں کی خلاف ورزی کرنے والوں کے خلاف متعلقہ قوانین کے تحت کارروائی عمل میں لائی جائے گی۔ حکومت کا کہنا ہے کہ اقدامات کا مقصد صوبے میں امن و امان برقرار رکھنا اور شہریوں کے جان و مال کا تحفظ یقینی بنانا ہے۔