امریکا ایران جنگ، ٹرمپ نے خطے میں بڑی تبدیلیوں کا عندیہ دے دیا

واشنگٹن: امریکی صدر ڈونلڈ ٹرمپ نے ایران کے ساتھ جاری جنگ کے تناظر میں بڑے فیصلوں کا عندیہ دیتے ہوئے کہا ہے کہ امریکا فیصلہ کن مرحلے میں داخل ہوچکا ہے۔

امریکی میڈیا کو دیے گئے انٹرویو میں ڈونلڈ ٹرمپ نے ایران سے متعلق تین ممکنہ راستوں کا ذکر کیا۔ ان کے مطابق ایران کے خلاف مزید کارروائی، اس کی معیشت کو شدید نقصان پہنچانا یا پھر کسی معاہدے تک پہنچنا ممکنہ راستے ہیں۔

ٹرمپ نے کہا کہ ایران کو اپنے طرزعمل میں تبدیلی لانا ہوگی، بصورت دیگر امریکا کی جانب سے مزید سخت اقدامات کیے جاسکتے ہیں۔

امریکی صدر کا کہنا تھا کہ آنے والے دنوں میں مشرق وسطیٰ میں بڑی تبدیلیاں دیکھنے کو مل سکتی ہیں۔ دوسری جانب انہوں نے ایرانی صدر مسعود پزشکیان سے ملاقات کے امکان کا بھی ذکر کیا ہے۔

رپورٹس کے مطابق ایرانی صدر اور وزیر خارجہ کو اقوام متحدہ کی جنرل اسمبلی کے اجلاس میں شرکت کے لیے امریکی ویزے جاری کیے جاچکے ہیں، جس کے باعث دونوں جانب سفارتی رابطے کا امکان بھی موجود ہے۔