سہیل آفریدی اور علی امین میں اختلافات، ڈی آئی خان کے فنڈز روک دیے گئے

پشاور: پاکستان تحریک انصاف میں اندرونی اختلافات شدت اختیار کرنے کے ساتھ خیبرپختونخوا حکومت نے سابق وزیراعلیٰ علی امین گنڈاپور کے آبائی ضلع ڈیرہ اسماعیل خان کے ترقیاتی فنڈز روک دیے۔

ذرائع کے مطابق وزیراعلیٰ خیبرپختونخوا سہیل آفریدی اور سابق وزیراعلیٰ علی امین گنڈاپور کے درمیان گزشتہ کچھ عرصے سے تعلقات کشیدہ ہیں۔ دونوں رہنماؤں کے درمیان اختلافات کے باعث سیاسی حلقوں میں بھی مختلف قیاس آرائیاں جاری ہیں۔

قومی اسمبلی کے رکن فیصل امین گنڈاپور نے ڈی آئی خان کے ترقیاتی فنڈز روکے جانے کی تصدیق کرتے ہوئے بتایا کہ خیبرپختونخوا حکومت کی آخری ریلیز، جس کی مجموعی مالیت 43 ارب روپے تھی، میں ڈی آئی خان کے لیے صرف 8 کروڑ روپے جاری کیے گئے۔

فیصل امین گنڈاپور کے مطابق ڈی آئی خان میں جاری ترقیاتی منصوبوں پر 50 سے 60 کروڑ روپے سے زائد مالیت کا کام مکمل ہوچکا ہے، تاہم اس کی ادائیگیاں واجبات کی صورت میں موجود ہیں۔ ان کا کہنا تھا کہ مالی سال 2026-27 کے لیے ان منصوبوں کے لیے صفر بجٹ مختص کیا گیا ہے۔

انہوں نے مزید بتایا کہ اے ایس ڈی آئی کے تحت ڈی آئی خان کے منصوبے کے لیے بھی رواں مالی سال کوئی بجٹ مختص نہیں کیا گیا اور بجٹ میں اس کی تخصیص صفر رکھی گئی ہے۔