نوشہرہ، ضلع خوشاب میں فراہمیٔ انصاف کے نئے باب کا آغاز

جوڈیشل کمپلیکس نوشہرہ کا افتتاح، عوام کو انصاف تک رسائی میں آسانی کا اہم قدم

نوشہرہ، خوشاب (نمائندہ خصوصی): چیف جسٹس لاہور ہائی کورٹ جسٹس عالیہ نیلم کے دورۂ نوشہرہ کے موقع پر جوڈیشل کمپلیکس نوشہرہ کا باقاعدہ افتتاح کر دیا گیا۔ افتتاحی تقریب میں اٹارنی جنرل پاکستان ملک منصور عثمان اعوان، ڈسٹرکٹ اینڈ سیشن جج خوشاب، ضلعی انتظامیہ، پولیس افسران، سینئر وکلا اور دیگر معزز شخصیات نے شرکت کی۔

چیف جسٹس لاہور ہائی کورٹ جسٹس عالیہ نیلم کی جوڈیشل کمپلیکس آمد پر انہیں گارڈ آف آنر پیش کیا گیا۔ اس موقع پر انہیں کمپلیکس کے مختلف امور، سہولیات اور منصوبے سے متعلق تفصیلی بریفنگ دی گئی، جبکہ انہوں نے شجرکاری مہم کے تحت پودا بھی لگایا۔

جوڈیشل کمپلیکس نوشہرہ کا قیام وادیٔ سون، سکیسر اور گردونواح کے عوام کے لیے انصاف تک رسائی کو مزید آسان اور مؤثر بنانے کی جانب ایک اہم عملی پیش رفت ہے۔ اس منصوبے سے مقامی شہریوں اور وکلا کو بہتر عدالتی سہولیات میسر آنے کی توقع ہے۔

ذرائع کے مطابق جوڈیشل کمپلیکس نوشہرہ کی منظوری اور اسے پنجاب حکومت کے سالانہ ترقیاتی پروگرام میں شامل کروانے کے لیے ملک منصور عثمان اعوان کی خصوصی کاوشیں بھی قابلِ ذکر ہیں، جن کے نتیجے میں یہ اہم منصوبہ عملی شکل اختیار کر گیا۔

علاقہ مکینوں اور وکلا نے جوڈیشل کمپلیکس کے قیام کو خوش آئند قرار دیتے ہوئے اسے وادیٔ سون اور ضلع خوشاب میں عدالتی سہولیات کی بہتری اور عوامی خدمت کی جانب ایک اہم سنگِ میل قرار دیا ہے۔

وعدوں سے آگے، عملی اقدامات کی طرف — نوشہرہ کے لیے ترقی، سہولت اور انصاف کی فراہمی کا ایک اور سنگِ میل۔