وزیر اعلیٰ بلوچستان کی اسکالرشپ پر منتخب طلبہ و طالبات سے ملاقات، تعلیم اور مثبت کردار پر زور

وزیر اعلیٰ بلوچستان میر سرفراز بگٹی نے مختلف صوبوں کی جامعات میں اسکالرشپ پر اعلیٰ تعلیم کے لیے منتخب ہونے والے طلبہ و طالبات سے ملاقات کی، جس دوران طلبہ نے وزیر اعلیٰ سے مختلف امور پر گفتگو کی۔

ملاقات میں ترقیاتی منصوبوں، گورننس اور بلوچستان کے نوجوانوں کے مستقبل سمیت مختلف موضوعات پر تفصیلی مکالمہ ہوا جبکہ سوال و جواب کا طویل سیشن بھی منعقد کیا گیا۔

وزیر اعلیٰ بلوچستان نے کہا کہ صوبے کے مختلف اضلاع سے میرٹ پر منتخب ہونے والے طلبہ و طالبات ان کے روشن تعلیمی مستقبل کی ضمانت ہیں۔ انہوں نے کہا کہ اسکالرشپ حاصل کرنے والے بیشتر طلبہ کا تعلق غریب اور متوسط طبقے سے ہے، جو ملک کی اعلیٰ جامعات میں تعلیم حاصل کر کے بلوچستان کا نام روشن کریں گے۔

میر سرفراز بگٹی نے کہا کہ ملک کی بہترین جامعات میں بلوچستان کے نوجوانوں کی تعلیم باعثِ مسرت ہے۔ انہوں نے پنجاب حکومت کی جانب سے بلوچستان کے طلبہ کو داخلوں کے ساتھ ٹیوشن اور ہاسٹل فیس میں معاونت فراہم کرنے پر وزیر اعلیٰ پنجاب مریم نواز شریف اور عوام پنجاب کا شکریہ ادا کیا۔

وزیر اعلیٰ نے طلبہ کو تلقین کی کہ وہ نظم و ضبط، محنت اور مثبت سوچ کو اپنا شعار بنائیں اور کسی بھی ریاست مخالف تنظیم یا منفی پروپیگنڈے کا حصہ نہ بنیں۔

انہوں نے کہا کہ ریاست مخالف عناصر غیر متوازن ترقی کے نام پر نوجوانوں کی منفی ذہن سازی کرنے کی کوشش کرتے ہیں، اس لیے طلبہ کو ایسے عناصر سے محتاط رہنے کی ضرورت ہے۔

میر سرفراز بگٹی نے کہا کہ پاکستان ہمیشہ قائم رہنے کے لیے بنا ہے اور ہمیشہ قائم رہے گا۔ بلوچستان کے طلبہ جہاں بھی جائیں پاکستانیت کا مثبت پیغام پہنچائیں کیونکہ وہ ملک کے سفیر ہیں۔